Drumb spricht got / aber sein geist / yn heiliger geschrifft. Ir solt frombde goter nit forchten. Ir solt sie nit anbeten. Ir solt sie nit eheren. Vnd vntherweißet vns / das bey sich ein ding ist. Bilder tzu eheren. oder. Bilder zu forchten. Derwegen soll ich kein bilde forchten / gleich wie ich keynes soll eheren. Aber (got klag ichs) mein hertz ist von Jugend auff yn eher erbiethung vnd wolachtung der bildnis ertzogen vnd auffgewachßen. vnd ist mir ein schedliche forcht eingetragen / der ich mich gern wolt endletigen / vnd kan nit. Alßo stehn ich in forcht / das ich keynen olgotzen dorfft verbrennen. Ich hette sorg der Teuffels narr mocht mich beleydigen. Wie wol ich die schrifft (an einem teyll) hab / vnd weiß. dz Bilder nicht vermogen / haben auch weder leben / bluth / nach geyst. Idoch helt mich forcht am andern teyll / vnd macht / das ich mich vor eynem gemalten teuffell / vor eynem schatwen / vor eynem gereusch eines leychten bletlins forcht / vnd flihe das / das ich menlich solt suchen.
Alßo magk ich sagen / wan man eynen bey den horen tzeugt. ßo merckt man wie vest seine hare stehnd. Hette ich den geist gottis nit wyder die olgotzen horen schreyhen / vnd sein wort geleßen. Szo hett ich alßo gedacht. Ich hab kein bild lieb. Ich forcht kein bilde. Aber itzt weiß ich / wie ich yn dyßem vall / kegen got vnd den bildern stehn / vnd wie vest vnd tieff bilder yn meinem hertzen sitzen.
Got woll mir sein gnad verleihen. das ich die teuffels kopffer (ßo gemeinlich heiligen in der kirchen genant seynd) nit mehr / dan stein vnd holtz / forchten thun. Vnd got geb / das ich stein vnd holtz nit / ym schein vnd nhomen der heiligen / ehere. Amen
Auß obvermelten schrifften volget / das Christen / gotlichem rath / willen / vnd gebott stracks nach volgen sollen / vnnd keyne bilder mher leyden. Vnangeßehen althen boßen gebrauch / Pestilentzische laher der Pfaffen / vnd das sie bucher der Leyhen mogen sein. Dan gott hatt machung vnd behaltung der bilder verboten.
Andreas Bodenstein von Karlstadt: Von abtuhung der Bylder. Wittenberg 1522, Seite 23. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Karlstadt_Von_abtuhung_der_Bylder_23.jpg&oldid=- (Version vom 17.8.2016)
