Seite:Hugo Martina 1856 0729.png

	Hugo von Langenstein: Martina

95

Div den truoc div ist gesat

An die obresten stat

Zvo dem kvnge in engellant

Schone an sine zeswen hant

Div ist aller megde gimme

100

Zvo ir gat der sünder stimme

Und tuot ir rede vnde wort

Zvo dem grundelosen erbermede hort

Von ir der armen sünder lebt

Da von ir lob an ahte swebt

105

Der svn wir lazen schone

Ob allem lobe die crone

Nv horent furbaz aber me

Uon sant Martinvn alse

Der alte sprach noch furbaz

110

Frowe dv solt wizzin daz

Martina mit volkomenheit

Uon gotte den gewalt treit

290,1

Daz si die liute mac losen

Uon geistlichen bekorunge bosen

Oder swaz dem libe werret

Vnd och die sel verierret

5

Uon got ist der gewalt ir

Vil ganze ist daz gelovbe mir

Alsam die hohin herren sint

Gewaltic vbir der welte kint

Und si in turnen twingent

10

Vnd mit gewalte bringent

Daz si leistent ir gebot

Swie si wellent ane spot

Sam tuot diu maget martina wol

Uon got ist si gewaltes vol

15

Allen kvmber mac si büezen

Aller slahte swere süezen

An selen vnd an liben

Beidiv mannen vnd wiben

Do disiv rede ende nan

20

Do verswant der alte man

Ie doch martinam den namen

Seldenrichen lobsamen

Div closter frowe wol behuob

In ir herze si in begruob

25

Und erwahte da mitte

Als wir noch haben die sitte

Doch hatte si cleinen trost

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 729. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0729.png&oldid=- (Version vom 18.8.2016)