Seite:Hugo Martina 1856 0702.png

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Hugo von Langenstein: Martina

Was sol die frode vber richen

Och hat sin riche der vil reine

Ihesus crist mit vns gemeine

Daz er vns kovfte vil tiure

10

Mit siner marter vngehiure

Och wirt den gotes kinden

Als wir geschriben vinden

Drier hande frovde kvnt

Die ir gerne wizzen munt

15

In der lihten himelschen stat

Div da ist aller froden sat

Die man zvo den trahten git

Ze bigerihten elliv zit

Ze merst div groz clarheit

20

Div machet vnsir frovde breit

Kein naht wirt da me gesehen

Als wir nv offenlichen spehen

Der stat ist keines liehtes not

Als got ie der welte bot

25

Dez manen schinen der sunnen glast

Daz hie der welt nie gebrast

Der bedarf man da niht

Man hat keines lihtes pfliht

279b,29

Wan gottes clarheit ane zal

30

Die stat erluhtet vbir al

Uon der kein sin getrahten

Kan noch gepfahten

So ist div ander frode gar

Der stete reinkeit sunderbar

35

Dar in so kvnt kein vnflat

Der div welt mengen hat

Ald swaz ist vngeneme

Oder dem herzin widerzeme

Wan ist da alles dez gewert

40

Swez lip oder sele gert

Und ist alles dez erlazin

Swaz bose ist oder verwazin

Och ist div dritte frode guot

Div den erwelten sanfte tuot

45

Daz ist der stette wite

Vmbe sich an alle site

Menger bekvmbert sine sinne

Wie er hie wite gewinne

Daz er doch lazin muoz

50

Und im froden machet buoz

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 702. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0702.png&oldid=- (Version vom 18.8.2016)