Seite:Hugo Martina 1856 0682.png

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Hugo von Langenstein: Martina

Och horent furbaz aber mere

Uon der einloften trahte here

Wan div ist als ich wene

10

Der welt vil selzene

Ir namen horent vber al

Si heizit frode ane truobsal

Dez pfliget man nu selten

Wan zvrnen vnde schelten

15

Ist nv so gar geneme

Der einloften trahte widerzeme

Fride ist ein reines krut

Der minne gemahel vnde trut

Wan div wil och niender sin

20

Da si muoz haben keinen pin

Wan got ist diu minne

Und wonet in reinem sinne

Ach minne wie süeze dv bist

Sant iohannes ewangelist

25

Schribet vns zetiute bi

Daz got div minne si

Noch furbaz er schribet

Swer in dor minne belibet

271b,29

Der belibet och in got

30

Und got in ime och ane spot

Swer danne in gotte welle

Vil gerne wesen der stelle

Daz er in der minne wese

Und die im selben vz lese

35

Wan so ist got in ime

Als ich die warheit vernime

Div minne ist ein gimme

Wan suoze hillet ir stimme

Minne ist der tugende leitstab

40

Daz nivwe gebot daz crist gab

Da er liden wolt den tot

Sinen iungern er suz gebot

Ein nvwes gebot ich iv sage

Ieglicher dem andern minne trage

45

Hie bi so werdent ir bekant

So ir die minne hant

Daz ir sint minne iunger

So ivch nach minne hunger

Da von swer minne treit

50

Der ist als ich han geseit

Cristes iunger vnde kint

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 682. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0682.png&oldid=- (Version vom 18.8.2016)