Seite:Hugo Martina 1856 0367.png

	Hugo von Langenstein: Martina

Si wirt so gar gekvrzit

Vnd het hie vngewurzit

Der welte frode vnde trost

Ach wie schiere div erlost

65

Wirt mit todis gehe

Vnd wie rehte smehe

Der mensche ist allen livten

Wer mohte daz betiuten

Dem man so sere minnet

70

Daz der so balt gewinnet

Uon hasse also grozen last

Mensche dv bist hie ein gast

Vnde wenest sin ein wirt

Der stetekeit bistu verirt

75

Dv mvst niht kvrzewile han

Uon den froden balde gan

Din zit ist schiere gezellet

Swie div welt doch stellet

Vf kvrzwile alle zit

80

Die noch kvrzir vf vns lit

Merkent der warheit sage

Wir stellen hie alle tage

Wie wir si gemachen kvrz

Die doch vf so gehit sturz

145d,85

Sint alhie gesetzit

Dez menger wirt geletzit

An den kvrzen froden sin

Diz ist hie der welte bin

Daz ist der gelovbe min

90

Ez wirt doch vil dicke schin

Lazen die rede ligen

An tot nieman kan gesigen

Swer hie enpfahet daz leben

Der muoz ez och wider geben

95

Dem tode hie zezinse

Swie vil man hie getinse

Grozir horde zesamin

Dez sich nieman wil schamen

Daz muoz doch hie beliben

100

Die warheit wil ich schriben

So ie der arge stirbet

Lip vnd sele verdirbit

Sinen herren wirt sin guot

Dar vf stat gar sin mvot

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 367. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0367.png&oldid=- (Version vom 18.8.2016)