Seite:Hugo Martina 1856 0307.png

	Hugo von Langenstein: Martina

Von siner muoter cluse

70

In schamelichim gruse

Gar allir cleider bloze

Kvnt er zvo der schoze

Nakint als die buoben

Zvo dirre welte huoben

75

Als er gar habe verspilt

Den grozin armuot mich bevilt

Er bringet her ein hemede

Lasterlichin frömede

Daz ich mit grozir clage

80

Und och mit schame sage

Mine frovde ez stœrit

Genemet vnd gehœrit

Wirt ez schamelichen ovch

Schamelicher zesehen dennovch

121d,85

Horint von dem gewande

Mit iamer mit schande

Bringet mit der mensche her

Nach der nature ger

Eine blvot varwe wat

90

Die im sin liebe muoter hat

Gegebin her zestiure

In sint anders tiure

Aller cleider genuht

Hant niht für vnzvht

95

Daz ich daz cleit celle

Er ist och der helle

Eigen vnd ir grunde

Uon angeborner sünde

E in wider hie kovfe

100

Div genade gotis tovfe

Vnd in hie enslovfe

Uon der svnden trovfe

Gedenkint wie rehte arn

Kvmet her der menschen barn

105

In svnden fluche verbennet

Und doch niht erkennet

Sin vbir mezigen armvot

Vnd och dekein guot

Daz er hie mac bervoren

110

Uon hinnan hin gefuoren

Nach der warheit vergiht

So braht er och her niht

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 307. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0307.png&oldid=- (Version vom 18.8.2016)