Seite:Hugo Martina 1856 0279.png

	Hugo von Langenstein: Martina

Nach ir sinne lere

111c,57

Sich mit gote erkosete

Und sinen gewalt erglosete

Lieplich svnder smeichen

60

Do tet got ein zeichen

Der tugende riche stahel

Dur sine liebin gemahel

Der centurionen siben

Die mit pine vmbe triben

65

Den lip dirre megde

Mit marters geiegde

Den siv vbel handelotten

Daz sich die wandelotten

Alle siben zemale

70

An ir marter quale

Vnd ruoften vil snelle

Mit luter stimme helle

Keisir dir si geclaget

Unsir craft ist veriaget

75

Gein dirre frowen

Wir sehin vnde schowen

Daz ist ane lovgen

Gotis engel tovgen

Div vnser sele lagent

80

Und vns armen plagent

Mit ysninen sparren

Swie wir langer harren

So sin wir verdorbin

Von in vnd erstorbin

111d,85

La dir herre gezemen

Heiz si von vns nemen

Wir sin nach fromeden sitten

In den aderan versnitten

In dez libes marge

90

Sin wir verseret arge

Dar vbir vnser gebeine

Groz vnde cleine

Darzvo vil vngehiure

Als von einem fiure

95

Vnsir fleisch geroestet

Alsvs vngetrœstet

Unsir lip hitzet

Vf kvmber gespitzet

Rvoche vns keiser gewern

100

Dez wir herzclich gern

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 279. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0279.png&oldid=- (Version vom 18.8.2016)