Seite:Hugo Martina 1856 0253.png

	Hugo von Langenstein: Martina

Also wurden die bekort

Ir genuoge man versande

Von ir vatter lande

25

Uerre in wildiv einlant

Da siv waren vmbekant

Vnd von hunger sturben

In mengewis siv verdurben

101b,29

Vnd ir lebin gesetzit

30

Ir wart och vil geletzit

In zer lazin wallendez bli

Da siv doch beliben fri

Uor allem vngemache

Mit menger hande sache

35

Siv den smak gulten

Da mitte siv erfulten

Ir lip vnd och ir sele

Mit dem hohen got emanuele

Der in himilrich gehiez

40

Und niht vngelonet liez

Swaz in der marter spiez

Tet vnd der helle fiez

Daz man ir leben tete mat

Wart ir etslicher gesat

45

In wallendez öl heiz

Daz ir lip niht enbeiz

Und wol da von genasen

Ane marter mazen

In ysen wart ir vil versmidet

50

Svmelich gar entlidet

An ir lidern allen

Dv spotliches schallen

Nivwe marter siv funden

Etsliche siv bunden

55

Wilden rossirn an sweifen

Und iamerlichen sleifen

101c,57

Vber velt vnd dur stocke

Mit mengem wilden zocke

Dvr studen vnd dur hursten

60

Den scherpfesten vnd wursten

Swar so div ros beduhten

Uor wilde siv niht schuhten

Man mohte ir vil schowen

Alse swin zerhowen

65

Vnd vz in riemen sniden

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 253. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0253.png&oldid=- (Version vom 18.8.2016)