Seite:Hugo Martina 1856 0243.png

	Hugo von Langenstein: Martina

So gat daz vil schone tier

Vil geswinde vnde schier

25

Uffen rvowe inhiuli

Daz vil minneclich fiuli

Vnde slafet drie tage

Nach dez meisters sage

97b,29

Darnach ez erwachit

30

Als sin nature machit

Und lat eine stimme groz

Einen brüelenden doz

In den lvft witen

Mit dem ane biten

35

Lat er einen süezen drast

Und einen froderichen blast

Der vertriffet alle wurzen

Ich wil die rede kvrzen

Sin svze volleclichen wiget

40

Fur swaz div welt pfliget

Wurzen vnd aromata

Die sint hie vertroffen sa

Darzvo alle picment

So der welte fursten hent

45

So sin stimme wirt vernomen

Vnd der smack vollekomen

So volgent im vil balde

Div tier von dem walde

Und sinem svzen smacke

50

Wan alleine der tracke

Dem ist also grimme

Dez pantieres süeze stimme

Die er balde fliuhit

Und sich dannan zivhit

55

Tovgen inder erde hol

Da er danne truwet wol

97c,57

Vor der stimme genesin

Und dem smacke sicher wesin

Ze samen er sich zvckit

60

Mit vorhten versmuckit

Lit der vngeneme

Der vngehiur wider zeme

Gelichir wis den toten

Sin craft ist im verschroten

65

Div andern tier mit ir schar

Nement dez pantieres war

Vf sinen spor siv gahint

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 243. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0243.png&oldid=- (Version vom 18.8.2016)