Seite:Hugo Martina 1856 0227.png

	Hugo von Langenstein: Martina

Wie der keiser si enpfienc

Dez horent fromede kœse

Uon hofart der lœse

Do er si an blihte

100

Sin hobt er vf rihte

Von meine der bewollen

Uon hohfart der geswollen

Sprach zer minneclichen

Von tugenden der vil richen

105

Noch volge minem rate

Und bringe din opfir drate

Den helfe richen gotten

Vor disen werden rotten

Und erkenne ir hohen gewalt

110

So vollekomen so menicvalt

Von den die liute lebint

Und allen creaturen gebint

91,1

Sinne vnd vernünste

Vnd menger hande künste

Die ieman kan betrahten

Die hohen wol geslahten

5

Die den himel rihtent

So meisterlichen pflihtent

Daz maht div wol lernen

An vngezalten sternen

Wie siv ir lovf enpfahint

10

Und ane sumen gahint

Nach ir rehten rente

An dem hohin firmamente

An dez manen schine

Wie der wahze vnd swine

15

Wie div lihte svnne

So frode bernde wunne

Alder welte lihet

Ir liehtes niht verzihet

Dekeiner creatiure

20

Si svoche frovden stiure

An ir svzen glaste

Vnd wie rehte vaste

Hie div sinwel erde

In loblichim werde

25

Uon ir stet geblvomet

Vnd wunneclich geruomet

Mit blvomen menger leige

Wie siv der lihte meige

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 227. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0227.png&oldid=- (Version vom 18.8.2016)