Seite:Hugo Martina 1856 0164.png

	Hugo von Langenstein: Martina

Do er in dem fiure stuont

Alse die verfluochten tvont

Mit den ovgen er vf sach

90

Lazarum vil gemach

Han in abrahamis bvosen

Gar ane leidez truosen

Vnd im was von fiure we

Uater abraham er schre

95

Geruche dich erbarmen

Vnd sende mir vil armen

Lazarvm zetroste her

Daz er nach miner ger

Mich dirre not ergetze

100

Vnd sinen vinger netze

Doch in einem wazzer

Und mir mache nazzer

Vnd kvle die zvngen min

Wan ich lide grozin pin

105

Uon dez fures flammen

In dirre helle wammen

Abraham antwurte im do

Svn dv bist gewesin fro

Nach wunsche vertriben dine tage

110

So hat lazarus mit clage

Verslizzin elliv siniv iar

In kvmbir stille vnd offenbar

66,1

Nv sol er iemir frovde pflegin

Enpfahin minen hohin segin

Der mit seldin ist gewegin

Im vnd mengem werdem degin

5

So solt dv iamer dulden

Nach dinen alten schulden

Och ist ein michil vnderscheit

Enzwischent vns vnd iv geleit

Daz hie die erwelten

10

Zefrovden die gezelten

Von vns zvo iv niht komen mvnt

In froden siv beliben svnt

Iemer ewecliche

In der froden riche

15

Ovch ist der wec iv benomen

Uon iv mac nieman her komen

So wil ich dich vater bittin

Abraham nach minen sittin

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 164. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0164.png&oldid=- (Version vom 18.8.2016)