Seite:Hugo Martina 1856 0158.png

	Hugo von Langenstein: Martina

An sinem dienste blœde

Dez vil süezin winis smack

Er govchit sinen horsack

45

Ist er alt er wirt ivnc

Mengen frolichin sprvnc

Wil er danne sprechin

Darzvo liedir singen

Uon gotte harte verre

50

Sin frovde wirt vil mere

Von wine danne von biere

Svz wirt er zeime tiere

Daz er niht got erkennet

Swer sich nv also wennet

55

Der sol den stanck dulden

Billich vnd von schulden

63c,57

Vnd dez iemir mere pflegin

Der sehz tusint iar gelegin

Hat in der helle svtten

60

Den ie die tievil butten

Irn vil liebin gesten

Den hohsten vnde besten

So div welt hat erzogen

Die hant sich in die helle gesmogen

65

Pylatus vnd herodes

Die dez ewigen todis

Sint erstorbin vnd doch lebint

Iemir me zepfande strebint

In dez tievils landen

70

Nach pfandes reht verstanden

Doch wil si nieman lœsin

Die veigen vnd die bœsin

Ich rede ez ane visiln

Die sint gesworn gisiln

75

Dise herren beide

Siv brechint niht ir eide

Dvr dekeinir slahte not

E daz siv wurden scham rot

Siv hant also vesten muot

80

Vbir lip vnd vbir guot

Liezin siv ez beide gan

E man siv sehe in laster stan

We waz eren sprach ein frösche

Disen schimpf vnd disen hosche

63d,85

Svnt ir niht fur vbil nemin

Spottes sol im gezemin

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 158. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0158.png&oldid=- (Version vom 18.8.2016)