Seite:Hugo Martina 1856 0090.png

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Hugo von Langenstein: Martina

Do fuorter für den süezin gast

Dem an gedult nie gebrast

Vnd saz alda zegerihte

Uor mengem bosen wihte

35

Da ihesu wart vil menic geboz

An der stat licostrotos

In ebreisch hiez si Gabata

Vnd was och an dem tac alda

Der da heizit parasceve

40

Do im geschach so rehte we

Intivsch der stille fritac

An dem der welte selde lac

So der stunden zit gelit

Div da heizit sexte zit

45

Pylatus sprach zerselbin frist

Sehint wa ivwer kvnic ist

Die ivden huobin michil wvof

Vnd was gemein ir allir wuof

Hab vf wan sol in toten

50

Dez cruces martir noten

Do sprach pylatus offenlich

Ivwern kvnic den crucigon ich

Siv sprachin wir han kvngis niht

Noch keines kvnges vergiht

55

Wan dez keisers alleine

Der ist vnsir kvnec gemeine

36c,57

Pylatus do den ivden bot

Jhesum in dez cruces not

Den furten siv gevangen hin

60

In dez todis vngewin

Jhesus sin cruce selbe truoc

Nv horent welh ein vnfuoc

Noch wart doch nie kein morder

Noch vbiltat ein horder

65

Der welt vil vngeneme

Noch so widerzeme

Noch so gar verwazit

Uon der gemeinde verschrazit

Noch so gar verfluochit

70

Dez eht ieman ruochit

Noch so gar verbannen

Von frowen noch von mannen

Noch so gar verehtet

Uerschrivwen noch versmehtet

75

Er funde doch nach vngelvke

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 90. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0090.png&oldid=- (Version vom 18.8.2016)