Seite:Hugo Martina 1856 0085.png

	Hugo von Langenstein: Martina

30

Vnd ovgten mengen bosen tuck

Pylatus sprach ze ihesu

Sag mir die rehten warheit nv

Dv bist kvnic der ivden diet

Daz eim der süeze also beschiet

35

Ja dv hast die warheit

Rehte von mir nv geseit

Pylatus sprach zen knehten

Den hohsten vnd den rehten

Ich vinde an im dekeine schulde

40

Do sprach si mit vngedulde

Er hat daz volk verkert

Vnd aldaz lant enteret

Uon Galylea vntz her

Vil gar nach siner valschir ger

45

Do Galylea wart genant

Pylatus fraget da zehant

Und erkande daz wol da

Daz er von der herschaft

Herodis was vnd siner craft

50

Ob er wære von Galylea

Vnd sant in zvo heredes da

Dem kvnge der was sin gar fro

Er hate in dicke gerne gesen

E vnd mohtes sin geschehin

55

Er hette gehorit siniv zil

Von im grozer wunder vil

34c,57

Und dinget in der gehe

Daz er von im gesehe

Etlichis zeichin

60

Er begunde smeichin

Mit vil menger frage

Da wider tet er trage

Vnd wolt im niht antwürte gebin

Die ivden stalten vf sin lebin

65

Mit vil mengir clage groz

Groz geschrei vnd michil doz

Mohten siv mit allir craft

Herodes vnd sin ritterschaft

Die smahten in sa zehant

70

Siv leiten im an wiz gewant

Und triben mit im wunder

Spotes da bisvnder

Vnd sant in do pylato wider

Und wurden guote frivnde sider

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 85. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0085.png&oldid=- (Version vom 18.8.2016)