Seite:Hugo Martina 1856 0022.png

	Hugo von Langenstein: Martina

Daz ir ist clein derwalte guot

35

Dv bist ein milter geber kvnst

Ane nit mit gantzir gunst

Dv bist gar ane masen

Siv müesen tobinde rasen

Die von dir sagent niht wan guot

40

Dez vaters zartiu swankil rvot

Div siniv kint verswinget

Und siv zevorhten bringet

Daz siv sich üebint geistlich

Vnd lant die minne vleischlich

45

Dv bist ovch ewic iemir

Und wirt och ende niemer

Diner hohin gotheit

Von ewen zewen an geleit

Ob allen kvngen kvnc genant

50

Dir sint elliv herzin erchant

Und ir gedanke rehte bar

Dir dienit allir engil schar

Allir creature herre

So ist din craft noch merre

55

Wan dinen lihten ovgen

Kan niht beliben tovgen

9c,57

Gesihtic vnd ungesihtic

Ez muoz dir sin vergihtic

Ez flieze ez krieche ez fliege

60

Wan der vil tumbe giege

Der mit diner hende

Ane missewende

Nach dir wart gebildet

Der sich alleine wildet

65

Gein dir vnde nieman me

Dez mac sin werden daz geschre

Dv hast in diner güete

Mit selderichir blüete

Einen gotlichin namen

70

So heren vnd so lobsamen

Gegebin ihesu cristo

Dinem sun dez bin ich fro

Mit dem dv sterkist alle die

Die din veriehint vf erde hie

75

Hohir got Emanuel

Dich rufet an lib vnd sel

Der hie ist gein wurtic

Unvertic vnd vnfürtic

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 22. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0022.png&oldid=- (Version vom 18.8.2016)