Seite:Duerer Underweysung der Messung 042.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen

Aber ein andre lini / die sey genant ein spinnen lini / darum das sie im aufreissen / dardurch mans macht scheir einer spinnen enlich ist / die mach jch durch ein zwifache bewegung also / Ich reis eyn aufrechte lini .a.b. daran setz jch ein andre lini der end sey .c. vnd die lini .a.b. laß jch im end a stet bleiben / Aber das end .b. fu^er jch in zirckels weis herumb / wie jch dann der end im vmblauf vberal mit .b. vertzeichent hab / Darnach soll im end .b. die ander daran gestossen lini .c. mit jrem hyndern ende im punckten .b. auch stett bleiben / aber das fo^erder end .c. soll in zirckels weiß herum gefu^ert werden / So dann die erst lini vmgefu^ert / vnd die ander anstosset auch sonderlich herum gefu^ert wirdet / so zeichent das end .c. ein sonderliche lini / damit aber dise lini gewyß gefu^ert werd / so setz jch eyn zirckel mit dem ein fuß in den punckten .a. vnd reiß mit dem andern fuß eyn zirckellini vnder dem /b/ die gradir jch auch in theyl mit ziffern / dardurch die lini .a.b. von punckt zu^o punckt gewyß gee / Des gleichen thu^o jch jm auch im punckten .b. vnnd so offt jch mit der lini .a.b. eyn grad gee / so oft gee jch auch ein grad im zirckel .b. mit der lini .c. so zeichnet das end .c. die punckten zwischen den jr lini zu^osamen soll getzogen werden / die jch vberall mit .c. verzeichent hab / wie das nachfolgett aufgeryssen ist.

40

Nachfolget will ich ein Instrument machen / damit man an vil end / hoch / nyder / zu^on seytten / fu^ersich oder hyndersich / eyn schlangen lini deu^eten vnd reissen mag / Solchs instrument wirdt an stangen gebogen gewendt vnd vmbgeryben / vnnd in glidern der stangen so^ellen scheiben seyn / In der Centrum so^ellen die bu^og sein darin es vmb geet / ein teil mag fu^ersich das ander hyndersich oder wo man hyn will gebogen werden / oder alle mit eynander fu^ersich oder hyndersich / vnd in welchen

Empfohlene Zitierweise:
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 42. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_042.jpg&oldid=- (Version vom 31.7.2018)