Seite:Duerer Underweysung der Messung 022.jpg

	Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen

Item noch will jch leren ein eynfache schneckenlini ziehen / durch ein andern weg dann vor / dem thu^o also / Mach einn rechten quadranten auff deutzsch ein firteil von eym zirckel .a.b.c. vnnd das /b/ sey das Centrum / aber das /a/ oben / vnd das /c/ auff der seytten / Darnach teyl solch zirckeltrum mit eylff punckten in zwo^elff gleiche teil / vnd heb die zal an bey dem punckten .c. / vnd zeu^ech auß allen punckten auffrecht barlinien herab / byß in die zwerch lini .c.b. vnd betzeichen sie mit gleicher weyß / mit den zyffern / als das zirckeltrum vnd heb auch die zal an bey dem negsten punckten nach dem .c. also ist dise gerade lini .c.b. vergleichlich geteylt nach dem zirckeltrum .a.c. nun ist der erst grund zu^ogericht Darnach reiß darunder auß einem punckten .c. ein halben zirckel / dem o^ebern quadranten gleich fo^ermig / also das die gerade lini die den halben zirckel von eynander schneidt / auffrecht sey oben .a. vnden .b. vnd das Centrum .c. in der mitt. Darnach teil die halbe zirckellini mit eylff punckten in zwo^elff gleiche felt / vnd heb die zal oben bey dem .a. an zu^ozelen / darnach zeu^ech gerad linien / auß allen punckten der zalen in den punckten .c. / Darnach zeu^ech stram^{[B 1]} lini auß dem Centro .c. in all punckten der zal^[1] / darnach nym ein zirckel / vnd setz jn in den o^eberen quadranten mit dem ein fuß in das Centrum .b. vnd den andern fuß setz auff der zwerch lini .c.b. in den punckten .1. vnd nym dise weyten mit dem zirckel / vnnd trag sie herab in den halben zirckel / vnd setz den zirckel mit dem ein fuß ins Centrum .c. vnd den andern fuß setz oben vnder dem .a. auff die auffrecht lini .a.b. vnd reyß von dann rund hynauß byß an die streim^{[B 1]} lini .1.c. zu^o disem punckten so sich gibt / setz auch die zal eins / Darnach nym den zirckel wider / vnd setz jn mit dem eyn fuß in quadranten / in das Centrum .b. vnnd den andern setz auff der zwerch lini .c.b. in den punckten zwey / Vnd nym aber dise weyten drag sie in den vndern halben zirckel / vnnd setz den zirckel mit dem ein fuß in den Centrum .c. aber den andern fuß setz auff die streim lini /1/c. vnd reiß rund von dann zu^o der andern streim lini .2/c.^[2] vnd zu^o diesem punckten setz auch die zal zwey / Also thu^o jm fu^erbaß zwischen allen streim linien des vndern halben zirckel riß / So du nun alle vorangetzeigte weyten auß dem o^ebern quadranten nymst / auff der zwerch lini .c.b. vnd tregst sie herab vnd betzeichens jr punckten / die da durch die zirckelryß worden sind / mit jren zu^ogeho^ereten ziffern / bey den streim linien / so wirdet dir dardurch angetzeygt wie du den gang der schnecken lini von aussen der zirckellini / von dem punckten .a. in Centrum .c. fu^eren solt / von punckt zu^o punckt / wie jch dann solchs hie vnden hab auffgerissen / Item du magst allwegen den zirckel mit dem ein fuß der da vmlaufft in der aufrechten lini .a.c.b. stellen / vnd von dann reissen byß zu^o seiner streim lini dyß zeygt etwas sonders an / wie du im auffreissen sichst.

18

Anmerkungen (Wikisource)

1. Die Worte Darnach zeuch stram … in all punckten der zal sind eine Verdoppelung der vorherigen Aussage und sind in der Fassung von 1538 gestrichen.
2. Vorlage: 2/5

Wortbedeutungen

1. stram o. streim = Strahl, Radius; vgl. stram und streim bei Grimm

Empfohlene Zitierweise:
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 22. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_022.jpg&oldid=- (Version vom 31.7.2018)