Seite:Duerer Underweysung der Messung 012.jpg

	Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen

Nvn will jch dise egemachte schneckenlini / noch ein mal verendern / durch das puncktirt richtscheydt .a.b. darauß die schneckenlini gemacht wirdet / die mus man anderst dann vor puncktirn / das geschicht durch zweyerley linien / einer krumen vnd geraden / die da zu^osamen gesetzt werden / da eine durch die andern gemessen wirdet / vnd eine der andern vngleich / doch vergleichlich / wie woll durch vngleych teyl die mach jch also / Ich reiß einn auffrechte lini / als lang das richtscheydt ist damit jch die schneckenlini mach / die sey oben .b. vnden .a. Darnach reiß jch ein zwerch lini .c.d. also das die auffrecht mit dem punckten .a. gerad zu^o gleichen wincklen darauff stehe / Darnach reiß jch ein gerade ortlini .d.b. vnd nym ein zirckel vnd setz jn mit dem ein fuß in den punckten .d. vnd mit dem andern fuß in den punckten .a. vnd reiß von dann rund vbersich byß in den ort strich .d.b. vnd wo sie die an ru^ert da setz jch punckten .e / Darnach theyl jch dise krume lini .a.e. mit .23. punckten in .24. gleiche felt / vnd reis auß dem punckten .d. gerad lini durch all punckten in .a.e. byß in die gestrackt lini .a.b. Vnd wo dise linien die lini .a.b. durch schneiden / die selben punckt betzeichen jch mit zyffern / vnnd heb oben vnder dem .b. an zu^e zelen /1/2/3/4/etc. / byß herab zum .a. aus dem erscheindt wie sich die fellt zwisschen den punckten vbersich erweytern / vnnd vnden herab enger werden / Dyß punckten stich jch auff eyn richtscheidt / das jch in der arbeyt im vmblauffen brauchen will / So^elche zu^o ru^estung hab jch hie vnden auffgeryssen vnd merck sonderlich das auß disem stu^eck vill zu^e machen / das hie nit angetzeigt ist / Dise schnecken lini laufft nit parweis vbereinander.

Nach diser lini .b.a. mus das richtscheydt zum vmlauff des schnecken puncktirt werden.

8

Wiltu aber aussen zwischen der schnecken lini die felt noch^[1] mehr erweytern vnd hynein enger machen / so leyn die auffrecht lini .a.b. oben mit dem .b. gegen dem punckten .c. Vnnd reis darnach die ortlini .d.b. wider zu^osamen / so wirdt der zirckelriß .a.e ku^ertzer / Darnach theyl allding von newen wider ein wie vor so finstu in der arbeyt eyn gros endrung / solchs ist auch oben im auffreissen zum theil antzeigt / So nun die verendert lini .a.b. mit jren punckten auff das richtscheidt gestochen wirdet / alßdann reis ein runden zirckelris darin dein richtscheit vnden mit dem punckten .a. den Centrum / vnd oben mit dem punckten .b. den zirckelriß anru^er / vnd setz oben auff^[2] den punckten .b.12. vnnd nym den gebrauch wie vor in der negsten schneckenlini angetzeigt / Doch wie du vor auß dem Centro herauß geloffen bist / also lauff itzt von dem eussern zirckelris hinein / Darum setz die zyffer der punckten im zirkelris auff die ander seyten / vnd heb an zu^o zellen .1/2/3/4/etc. so sichstu den vnderschidt gegen der vorigen lini / wie das hie vnden zwyr / der fordern ordnung gemeß auffgerissen ist / da bey du sichst wie eins hu^ebscher dann das ander ist.

1. Vorlage: fel tnoch
2. Vorlage: anff

Empfohlene Zitierweise:
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 12. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_012.jpg&oldid=- (Version vom 31.7.2018)