|
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen |
|
|
Es ist zue merckenn / das dise obgedacht drey Linien muegen kurtz oder lang getzogen werden / Vnd so mans erreychen moecht / vnd die zeyt nit hyndert / moecht die gerad Lini ewiglich hynauß getzogen / oder auffs wenigst gesunnen werden / Sy ist auch dreyerley weyß zue brauchen / alß auffrecht / vber zwerch / vnd vber ort / Aber die zirkellini / mag gantz oder zum teil gebraucht werden / vnd kannit lenger getzogen werden / den von anfang wider dahyn / da sie angefangen hat / soll sie aber fort gen / so kombt sie wider in den vorigen vmlauff / Diese zirkellini mag groß oder kleyn fuer genuomen werden / So man sie aber steygen macht / oder vndersich fellt / so wirt eyn Schlangen lini darauß. Aber die Schlangen Lini ist vnentlich zueuerendern / darauß man wunderbarlich ding mag machen / Es sey in die Leng / Weyt / Hoech /oder Tyff / vnd wie es wißlich ist / das man allein vil seltzams dings / mit eyner Lini machen kan / da von die nichts wyssen / die jm nit nach dencken / vnd auch hie wenig[1] da von gemeldet wirdet / ist woll zuedencken / was mit zweyen dreyen oder vill Linien auß zuerichten sey / Vnnd sonderlich so die Dreyerley vnderschyd der Linien / mit allen zuefellen zuosamen gebraucht werden / Dann es sind vil Linien zuomachen / die on[2] hilff andrer Linien nit kuennen getzogen werden / Auch ist not zuo wyssen / was Paralell lini sind / im Latein also genant / die jch in vnserm deutzsch parr Lini will heissen / Diß sind soelch Lini / das sie allweg gleych weyt von eynanderlauffen / man zych sie schlecht / oder Schlangenkrum / oder in zirkels weiß / Man soll auch wyssen / wo zwuo Lini nicht gleych miteynander lauffen / das sie im end zuesamen komen / vnd eyn spitzen winckel machen / Darumb zwey Perpendicular neben eynander / Das sind zwuo bleyschnuer / die da neben eynander hangen / geben nit gentzlich zwuo auffrecht Barlini / Dann sie lauffen im mittel punckten des erdrichs zuesamen / vnd machen eyn spitzigen winckel / Also thuont all Linien / die nit gleich miteynander lauffen / Eintweder sie komen im endt zuesamen / oder aber sie lauffen stettig weytter von eynander / wie vorgemelt / Das aber die auffrechten wag Linien fuer barlinien gebraucht werden / ist auß der vrsach / das sie so weyt als nemlich[3] biß ins mittel des erdrichs zuelauffen haben / der halb das vnserm synn im gesicht vnmerckenlich wirdet vnd ist / Aber diese sort der bar vnd wag linien / hab jch hie vnden auff geryssen[4] / gerad schlangenkrum[5] / zirckelkrum / vnd wagrecht.
Wo man nun eyn wenig verstanden hat / was die Lini seyn / vnd jr vnderschyd / So will jch fuerbaß reden von der selben leng die auch eyn breytten hat / die allweg mit gee / sie werd schlecht[6] oder krum getzogen / Die nent man Planum im latein / aber in deutzsch weyß jchs nit anders[7] zue nennen / Dann ein ebne / wie woll mancherley vnderschyd darinn ist / wie hernach folgt / Eyn ebne moecht erdacht werden die auff allseyten keyn end het / Aber von der selben woell wir hie nit handlen / Alleyn von denen die da anfang vnd endt haben / vnd die mit linien vmbtzogen muegen werden / auff das sie eyn gestalt gewynnen / Der selben sind mancherley / der jch eynteyls hie will anzeygen / Die erst ebne ist gantz gleich / also das sie weder hoch noch nyder oder krum ist/ Zum andern ist
Albrecht Dürer: Underweysung der Messung, mit dem Zirckel und Richtscheyt, in Linien, Ebenen unnd gantzen corporen. Nürnberg, 1525, Seite 8. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Duerer_Underweysung_der_Messung_008.jpg&oldid=- (Version vom 16.12.2021)
