als wann er etwas in schwerem Gemüt / gesehen / fragten jn / warumb er so trawrig were? Er antwortet jnen / und sprach: Ich gedencke jtzt / wem ich was geliehen / und wie ich das meine wider bekommen möchte. Damit giengen sie von jm in das Maltzhaus / und er blieb allein im Keller / vermeinet das Bier wol zu versorgen. In dem als er in gedancken bey den Kohlen saß / uber eine kleine weil / dauchte jn / das jemand gar hart mit einem Wagen furüber fehrt und sich fur der Thür auffgehalten / da stund er / macht die Thür auff / und wolt sehen / wer da keme gefahren. Bald grieff jn an ein grosser schwartzer Man / und satzte jn uber die Kohlen / gieng gar seltzam mit jm umb / wandte jn hin und her / das er sich seiner nicht erwehren kunte / und wiewol er in der marter bey sich selbst war / und wolte am Faß einen Zapffen ergreiffen / damit er das Bier auff sich lassen und die Kohlen erleschen möchte / aber es dunckte jn / als wann die Fässer je weiter von jm abwiechen / das er eine lange weile gepeiniget ward / bis er endlich an Gott gedachte / und laut geruffen: Gott sey mir gnedig und barmhertzig. Der Zeit die Fraw das Geschrey gehöret / und heraus gesehen / in dem Keller gros Fewer erblickt / bald dem Schaffer und dem Lehrknechte sampt andern Gesinde geruffen / und jnen befohlen / das sie in Keller gehen / und was der Meltzer für ein Geschrey habe / ob sie darinnen ein Fewer vergessen / zuschawen sollen. Welche als bald sie dahin kommen / haben sie den Michael Meltzer auff der Schwellen ligende / und halb bis an die Gürtel gebraten / gefunden / welcher auff beider Seitten Hüffte also zurspalten / das man jme in die Wunden theils zweyer Finger breit legen kunt / doraus das Fette und Eytter geschwier geflossen / dann er ein ziemlich dicker Man gewesen. Das halbe Hembde / Hosen und Schuhe sind gar an jm verbrant: Vom Kopff bis auff die Gürtel ist kein Schade an seinem Leibe / noch an den Kleidern / als am Hembde / Hartzkappen und Wambs / geschehen / sondern alles gantz geblieben / ausgenommen am Lincken Arm ein schwartz Zeichen als eine
unbekannt: Grausame/ Erschreckliche newe Zeittung/ wie in einem Stedlen Muthenin genant/ [...]/ einen Meltzer mit Namen Michael/ [...]/ der Teuffel [...] von Fuß auff bis auff die Gürtel gebraten/ [...]. Erfurt: Esaias Mechler, 1603, Seite 4. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_vd17_12_665803C_004.png&oldid=- (Version vom 31.7.2018)
