Seite:De Zimmerische Chronik 4 243.jpg

	Froben Christoph von Zimmern: Zimmerische Chronik. Band IV. Herausgegeben von Karl August Barack.

Ee man zorn halben essen saß^[1],
Kam ainer, dem sollichs befolhen was,
Der lase zu tisch manch lieplich wort;

Hann ich das büechlin recht gehort,

5

So was es ganz von warer lieb,

Wie die manch herz bezwing und trieb,
Das es^[2] ir müßt gehorsam sein,
Und wie von lieb keme etwan pein.

Das hört ich inniklichen gerne;

10

Mich dücht, ich wellt es auch lernen.

Er las, biß das man gessen hett.
Der apt der winkt im an der stett
Und sprach: »Tu autem, domine!« 

Da hert er uf und lase nit me.

15

Die tisch die wurdent abgedeckt,

Ain weiße zwehel man umbherstreckt,
Ein guldin beckin und handtfas fein.
Der apt von erste wasser nam hin,

Darnach die anderen biß zu end;

20

An die zwehel wustens die hend

Alle, die da warend naß.
Zu hand trankend das gratias.
Mir giengen da schnell uf der fart

In ainem garten grüen und zart,

25

Von laub und auch in reicher acht,

Als ob es wer von wunsch gemacht.
Darin trib man der freuden vil,
Der ich nit aller nennen will,

Mit danzen, springen und hofieren,

30

Mit lautenschlahen und discantieren;

Und wen des tanzes da vertroß,
Der lag dem ander in die schoß,
Und doch, mit eren, als ich sag.

Sollichs übt man den ganzen tag

35

Bis aubendts, das man essen sollt.

Da wart ich, wie es werden wolt.
Freulich gieng es schon zuo, als vor;
Zusamen satzt sich par und par,

Wie zu mittag geschehen was.

40

Zu tisch zu aubendts niemands las;

Iederman redt^[3] von aubenteur.
Das leben deuch mich gar geheur;
Wann was ain ieder da begert,

Das wurt er ganz und gar gewert.

45

Ich hatte ain knecht von rechter gier,

Der was gesessen nach bei mir,
Das er mir sagte offenbar,
Ob es also wer durchs jar.

---

1. saß] hs. gaß.
2. es] hs. er.
3. redt] hs. recht.

Empfohlene Zitierweise:
Froben Christoph von Zimmern: Zimmerische Chronik. Band IV. Herausgegeben von Karl August Barack. Akademische Verlagsbuchhandlung von J. C. B. Mohr, Freiburg, Tübingen 1882, Seite 243. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Zimmerische_Chronik_4_243.jpg&oldid=- (Version vom 12.4.2018)