Froben Christoph von Zimmern: Zimmerische Chronik. Band III. Herausgegeben von Karl August Barack. | |
|
In dem jar nach Christi gepurt 1533 do hat sich die
erschrockenlich prunst zu Schiltach im Kinziger thal begeben, in dero das ganz stettle biß an ain haus allerdings in wenig stunden abbronnen. Das ist ußer volgender ursach zugangen. Es het ein fraw, hieß . . ., sampt irer dochter vor etlichen jaren zu Oberndorf am Necker
gewonet, die war ires übelhaltens, auch das sie und ir dochter des hexenwerks halb so gar hoch im verdacht, zu Oberndorf [639] nit wol sicher, muste sich vor herrn Wilhelmen Wernhern von Zimbern, der dozumal dise herrschaft inhet, besorgen, das sie gefengclich angenomen und villeucht
weiter irem beschulden nach mit inen gehandelt würde. Derhalben tratten sie uß, enthalten sich hin und wider, wo sie konten. Indes, als herr Wilhelm Wernher sich an das cammergericht thette, do übergab er die herrschaft seinem brueder, herr Gotfriden Wernhern, wie hievor auch gemeldet.
Wie nun ain newer herr zu Oberndorf, do erkeckt die jung dochter auch wider, dann ir muetter hiezwischen auch ...; und dieweil villeucht die amptleut daselbs von irem herren, herrn Gotfridt Wernhern, kain sondern bevelch irenthalben bekommen, der auch für sich selbs ein abschewens ab
solichen hendeln, do verhofft dieselbig auch dester sicherer zu sein, thette sich nach und nach wider geen Oberndorf und wandlet in der ersten haimlich, hernach aber offenlich dahin; und seitmals sie etwas wesenlicher und unargweniger, dann hievor beschehen, sich hielte, do ward auch das alt
geschrai und der verdacht dester ehe vergessen und veraltet. Standt also etlich zeit an, das sie geen Schiltach sich zu eim würt, hieß Hanns Schernle, verdinget. Die het nun
Froben Christoph von Zimmern: Zimmerische Chronik. Band III. Herausgegeben von Karl August Barack. Akademische Verlagsbuchhandlung von J. C. B. Mohr, Freiburg, Tübingen 1881, Seite 1. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Zimmerische_Chronik_3_001.jpg&oldid=- (Version vom 12.4.2018)