|
Froben Christoph von Zimmern: Zimmerische Chronik. Band II. Herausgegeben von Karl August Barack. |
|
|
Christof Friderich die herrschaft Haigerloch ledig und unverkömmert behalten sollt, dargegen sollt graf Jos die grafschaft Zollern mit allem schuldenlast uf sich nemen und bezallen. Hiemit überkam graf Jos die grafschaft Zollern,
dargegen zohe der ander hinüber geen Haigerloch. Da hauset er etliche zeit, hernach zoge er mit kaiser Carolo dem fünften für Marsilia. Dieweil er aber zuvor einer Rellingerin von Augspurg die ehe verhaißen, von der er auch ain dochter, Anna genannt, bekommen, nam er solichs so
hoch zu herzen, das er in ainem scharmitzel verwegenlich und fürsetzlich, tanquam Decius, in confertissimos hostes sich begab. Do wardt er erschossen; beschach den 3ten Augusti anno 1536. Damit aber dieser heirat etwas gründtlicher anzaicht
und wie es damit ergangen sei, so ist zu wissen, das doctor Hanns Rellinger[1] bei seinen zeiten ein fürnemer jureconsultus zu Augspurg, auch ein herliche person gewesen, mit ainem großen har, als dann die alten gewonn gewesen. Der hat bei seiner hausfrawen zwen [527] söne und drei schöner
döchteren bekommen. Catharina, die mitler, hat den unnutzen vogel Wilhelmen Arzet vermehelt, die jünger ist dem Melchior Ilsing worden, die eltest aber, Anna, ist die aller schönest gewest, darbei auch stolz, hochmüetig und verachtlich, das sich bei dem wol beschaint, das sie und ir
muetter iren fromen vatter und hauswürt, obgenant, in seinem grösten alter ganz küntlich und schmelich gehalten haben, darvon dozumal zu Augspurg vil geredt worden. Und wiewol ir muetter ein listigs weib, so hat sie doch ir schöne dochter so wol nit kinden verhüeten oder sie erretten. Sie
ist von ainem jungen[2] burger von geschlechter daselbs, genannt Jacob Adler, geschwecht worden. Der soll ir die ehe, wie man sagt, verhaißen haben, und ist ir der bauch darbei ufgangen, aber die gepurt ist verdistillirt worden, das man gründtlichen nit wissen mag, wohin es kommen
oder wie es darmit zugangen. So hat auch der Jacob Adler nit lang darnach gelept, sonder ist zu Augspurg ainer wunderbarlichen und seltzamen krankhait mit todt hingangen. Es ist aber die kintbet dieser Anna Rellingerin so wol verhelinget worden, das sein gar wenig dozumal inen worden;
Froben Christoph von Zimmern: Zimmerische Chronik. Band II. Herausgegeben von Karl August Barack. Akademische Verlagsbuchhandlung von J. C. B. Mohr, Freiburg, Tübingen 1881, Seite 423. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Zimmerische_Chronik_2_423.jpg&oldid=- (Version vom 12.4.2018)
