|
Froben Christoph von Zimmern: Zimmerische Chronik. Band I. Herausgegeben von Karl August Barack. |
|
|
also das er dir cost geb, und ob du icht verlurest, das redlich und kundtlich were, das soll er dir gelten. Wir haisen dich noch mer: Wann du disen brief ansehest oder hörest lesen, ald dir zu haus ald zu hof kom, das du darnach in
dem nechsten monat reitest geen Mösskirch in die stat und alle die stuck und wort, die an disem brief steen, das du offenlich dem vorgenannten herrn Wörnhern von Zimbern schwerest zu den hailigen, was davor geschriben steet, von dir zu halten. Und darum, das du wissest, das wir dessen
übereinkomen seien, so haben wir, grave Conradt von Fürstenberg und Oschwaldt von Wartenberg, frei, genannt von Wildenstain, und ich Hanns von Blumberg, ritter, den man nembt der Gepawer, alle vorgenennt unsere insigel gehenkt an disen brieve zu ainer warhait, der geben ward an sant
Laurenzius tag, do man zellet von Christus gepurt dreizehenhundert jar und im zwaiundsechzigisten jar.« Dises ist der vertrag gewesen, welcher hernach von Albrechten von Magen[A93b]buoch trewlichen erstatet und gehalten worden. Hernach circa annum domini, ungevärlich ain tausendt
drewhundert neunundsechzige, haben sich Albrechts von Magenbuchs hinderseßen von Krehenhainsteten geeußeret und deren ain tail geen Möskirch under vil gemelten herrn Wörnhern zogen und burger alda worden, welches den Albrechten nit wenig verdrossen und inen solchs zu weren understanden.
Als sie aber herr Wörnher vermög ires erlangten burgerrechts wider gedachten Albrechten von Magenbuch schützen und schürmen wolt, ist abermals ain span daraus worden, doch haben sie sich zu letsten güetlichen mit ainandern vertragen, dergestalt, so dieselben angenomne burger, vorhin
zu Hainsteten gesessen, hinach zu Messkirch nit bleiben wurden, das alsdann herr Wörnher sie wider den von Magenbuoch nit schürmen solt, und dermasen sein dieselben burger hinach zu Möskirch bliben.
[A94a] Es ist zu wissen, das umb die jar nach Christi gepurt ain tausendt drewhundert und sechzige die statt Pfullendorf vil [131] anstös von iren nachparn erlitten, dann
Froben Christoph von Zimmern: Zimmerische Chronik. Band I. Herausgegeben von Karl August Barack. Akademische Verlagsbuchhandlung von J. C. B. Mohr, Freiburg, Tübingen 1881, Seite 206. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Zimmerische_Chronik_1_206.jpg&oldid=- (Version vom 12.4.2018)
