auch halbe Carthaunen vor die Pforten gestellt / vnnd also den 2. Septembr. die Statt zum Accord gezwungen. Vnd ist die Käyserische Guarnison dreyhundert zu Fuß / vnd hundert vnd zwantzig Pferdt starck / außgezogen.
Nach etlichen Tagen ward beschlossen / daß die Offenburger sich / als Erb- vnd Leibeygene Vnderthanen / eydlich verbinden solten / dem König in Schweden trew / vnd hold zu seyn. Die Burgerschafft wurde gantz disarmirt, vnnd ein zimlicher Vorrath an Munition / Proviand / vnd Stücken / allda gefunden. Anno 1635. kam die Statt wider in den alten / vnd Schwäbischen Reichs- vnd Crayßstandt. Munsterus in Cosmogr. Crusius in Annal. Suevic. Hertzog in der Elasasser Chronick lib. 3. cap. 13. Item / geschrieben- vnd gedruckte Relationes.
Ein MeilWegs von Offenburg / vnnd etwas weiters vom Rhein / ligt das Schloß Ortenburg / in der Mordnaw / so die Schwedischen Anno 1632. mit Accord eyngenommen haben.
Ein schön / vnnd stattlich Benedictiner MönchsCloster / zwischen Mindelheim / vnnd Memmingen / vnnd zwar / von dieser letzten Statt / ein starcke MeilWegs / vnd an einem Wässerlein gelegen / so ein wenig vnderhalb in die Güntz fällt. Martinus Magerus, de Advocatia armata, cap. 5. n. 399. fol. 152. schreibet / auß Bruschio de Monasteriis Germaniae, Item de Episcopat. c. 8. pag,. 133. daß Ottenbeuren / oder Vttenburrhen / an der Guntz / von Syllacho, der Francken Hertzoge / LandVogten in Allemannien / vnnd Grafen im Ilergöw / vnnd seiner Gemahlin Eirmivvinda, Anno 764. gestifftet worden. Welches auch andere / vnd dieses darbey sagen / daß solches Otten: oder Vtenbeuren / ein Marcktfleck / vnd Schloß / der Grafen im Ilergöw / gewest / vnd dieses Closter in die Ehr deß Heil. Märtyrers Alexandri, der Heil. Felicitatis, (welche 7. Söhn / die alle vmb Christi Willen den Todt gelitten / gehabt) Sohns / gestifftet / vnnd der erste Abbt allda S. Totto, deß Stiffters Sohn / worden sey. Sihe Crusium part. 1. Annal. Suev. der deß besagten ersten Abbts Todte ins Jahr 817. setzet. Vnder seinen Nachfolgern waren auch S. Vlrich / hernach Bischoff zu Augspurg; Wiggarius, der Schweitzer Apostel / vnd S. Rupertus, der Anno 1145. im 120. Jahr seines Alters / gestorben. Es sollen in solchem Closter keine Ratzen bleiben können. Hat Anno 1521. vom Käyser Carolo Quinto das Halßgericht im Marckt Ottenbeuren / vnd den Bann vber das But zu richten / zu ReichsLehen empfangen. Es hat auch besagter Marckt / sampt allen Dörffern / Gericht / Weylern / vnd gantzer Gemeind / so vnter diesem Gottshause gesessen / jhrer ReichsPrivilegien Confirmation / zu Worms / im gedachten 1521. Jar / erlangt. Warumb aber solches Closter kein Reichs- oder Craißstande / oder einen gewissen Anschlag hat; daran ermangelt mir ein mehrer Bericht; weil ich allein finde / daß es zwar / vor diesem / auff die ReichsTäge beschrieben worden / aber nur ein Recepisse geben habe.
Ins gemein Auwen. Ligt im Hertzogthumb Würtenberg / ein Stundt von Kirchheim vnter Teck / vnd gehört ins selbige Ampt. Darob gleich der Berg / darauff das zerfallene Schloß Teck / der Hertzogen dieses Nahmens weyland Residentz / gelegen. Hat ein lustige Gelegenheit herumb. Besagte Hertzogen / haben dieses Stättlein erbawet / vnnd ist älter / als die Statt Kirchheim; von welcher die Kirchheimer / Gutemberger / vnd andere herumb / vor Jahren / jhre Gewicht / vnd Maaß / nehmen musten. Der Bach Lauter fließt dardurch. Hat viel alte Häuser. Im Chor der Pfarrkirchen ligen etliche Hertzogen von Teck. Hat auch ein Kloster allda. Anno 1838. ist solches Teckisch HauptStättlein dem Graf Eberharden von Würtenberg / vom Hertzog Friederichen zu Teck / sampt Gutemberg / vmb sechstausend Gülden versetzt worden. Crusius in Annalibus Suevic. Es schreibet D. Johan. Bauhinus, de Aquis Medicatis, etc. daß allhie
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 148. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_196.jpg&oldid=- (Version vom 8.10.2021)
