Gericht / vnd Stattschreibern. Vnter den Vlmischen Obervögten seyn allhie gewesen / Rudolff von Westerstätten / Burckhard von Bernhausen / Niclaus von Jagsheim / zu Ederhin / der Jünger; Hanß von Thierberg; Wilhelm Fetzer zu Neidlingen; Hanß Speth / Ritter; Walther von Hirnheim / zu Hocheltingen / Hanß Walther von Laubenberg / zu Werenwag; Wolff von Asch; Caspar von Freyberg / etc. Dieser Zeit verwaltet solches Ampt / Juncker Erhard Schad. Crusii Annal. Suev. Acta Publica, vnnd Relationen.
Auff ein halbe Meil / oder ein Stundt gehens vngefähr von Geyßlingen / ligt das Dorff Vberkingen / auch Vlmisch / vnnd Geyßlinger Ampts / daselbst ein gar gesunder guter Sawerbronnen ist / den viel Leuth im Frühling / vnd Sommer / besuchen / vnnd der auch nach Vlm getragen wird: Von deme ein sonst hochberühmbter / vnd gelehrter Medicus, in seinem newen Wasserschatz / Cap. 83. ein gantz jrrige Meynung hat / in dem er schreibet: Daß solcher allernächst bey der Statt Geyßlingen entspringet / vnd der Geyßlinger Sawerbronnen genandt / vnnd von dannen durch Rinnen / oder Canalen / zu dem besagten Vberkingen / zum Trincken vnnd Baden geleytet: Aber schier vmb das halb geringer / vnd schwächer / als der Göppinger / seye: Vnd zum Baden / auß Geitz der Badwirth / auch Wildwasser mit vntergemischt werde / dieweil deß Minerischen Wassers sonsten nicht genug wäre. Auß welchem erscheinet / daß er nie allhie gewesen / noch das Wasser getruncken / vnd probirt, sondern solches nur von andern gehört habe; sonsten gewiß er so viel Irrthumb nicht begangen; dem edlen Sawerwassen sein herrliche Würckung nicht entzogen / noch den ehrlichen Wirthen dises Vnrecht / vnd Schmach / angethan hätte. Vnd wer wolte so närrisch seyn / wann er das Wasser gleich beym Vrsprung / an dem vorgedachten lustigen / vnnd an der ReichsStrassen gelegenen Stättlein Geyßlingen / haben köndte / daß er ins Dorff Vberkingen ziehen / vnd daselbst auß den Rinnen trincken vnnd baden solte? Es ist deßwegen solcher Vrsprung allhie zu Vberkingen / von dannen auch das Wasser viel weiter / als das Göppingsche kan getragen werden; da man hergegen den Jebenhausischen Sawerbronnen nicht weiters bringen kan; wiewol derselbe einem Edelmann / der zu Vberkingen einem Burger / vnd der zu Göppingen / wegen seiner Gröbe vnd Rauhe / einem Bawren verglichen wirdt. Jn Podagrischen Zuständen solle der Vberkinger mehr / als der Göppinger thun.
Es ligt auch ein Geyßlingen am Kocher / vnd Biler / oder an der Steig / in einem Grund / vnd 3. Meilen von Schwäbischen Hall / vnd solcher ReichsStatt gehorig; durch welches Dorff der Ordinari Weg von Wimpffen auff Nürenberg gehet.
Statt / vnd Schloß / des Adelichen Geschlechts dieses Nahmens Stammhauß / im Craichgöw gelegen / dessen ein Theil / oder Anhang / die jenige Ebne ist / so man den Prurhein nennet / in welche sich deß Craichsgöw sehr fruchtbare Hügel / gegen dem Rheinwarts / hinunter lassen.
Diese ReichsStatt / deren Monatlich einfacher Anschlag zum Römerzug / ist hundert sechs vnd siebentzig Gülden / vnnd zum CammerGericht 75. fl. nach dem alten / nach dem erhöchten Anschlag aber / 125. fl. den Thaler zu 69. Kr. gerechnet / allda Henricus Leo[1], Hertzog in Bäyern vnnd Sachsen / in die Acht[2] erkläret worden / solle vnter dem Hertzog Friederichen dem Alten[3] / oder seinem Sohn Friderichen mit dem einen Aug[4] / Hertzogen in Schwaben / vmbs Jahr Christi 1090. vnd 1110. seyn bekandt / vnd von besagtem Einäugigen Friderico, mit einer Mawer vmbgeben: Hernach vnter Käyser Conrado III.[5] vnd Friderico Barbarossa[6] vermehret worden seyn / die sie auch mit dem Burgerrecht / vnnd Freyheiten begabet haben. Wurde erstlich Käysersgereut: Darnach Thiersgarten geheissen / daher noch der Bach / so allda vber dem Marckt laufft / Thieraich genandt wird. Der jetzige Name soll jhr daher kommen / weil daselbst vil Bächlein in
Matthäus Merian: Topographia Sueviae. Frankfurt am Mayn: Frankfurter Kunstverein, 1643/1656 (Faksimilenachdruck 1925), Seite 77. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_109.jpg&oldid=- (Version vom 15.2.2020)
