zu Eltershofen / dreyzehen Gebäw verbronnen seyn.
Von dieser dem Gefürsten Herrn Probsten allhie gehörigen Statt / ist der Text vnserer Topgraphiae Sueviae zu lesen. Es wollen Theils / daß die gantze Gegend herumb / vor Zeiten / Pagus Virgunensis, der Viragrund (jetzt Feuchtengrund) sey genant worden / so sich auff sieben Meil Wegs in der Länge / vom Schloß Baldern / biß zum Schloß Tannenberg: In der Breyte aber / von der Statt Dünckelspühel / biß an den Wald Host / erstreckte. Vnnd in solchem Firen / oder Viragrund / habe Anno 754. Arnolph oder Hariolphus, der Bischoff zu Langres, das Kloster / vnd zwar im Thaurwald erbawet. Es ligen allda in der Grufft / vnder dem Chor / die Heiligen Sulpitius, vnnd Servilianus, so Römer gewesen / die vnder dem Käyser Hadriano gemartert worden / vnd welche obgedachte Stiffter deß Closters / vom Papst Adriano bekommen: Item / jre Bräute Euphrosina, vnd Theodora / Jungfrawen / vnnd Märtyrin: Item / die Märtyrer Quartus, vnd Quintus, so vnder dem Käyser Trajano; der Märtyrer Bonifacius, der vnder Diocletiano zu Rom gelitten; Item Benignus, Speusippus, Eleusippus, vnd Meleusippus, drey Zwilling: Item / Leonilla, Junilla, vnnd Donatilla. Item die Märtyrer Neon, vnd Turbon. Als Anno 1460. das Closter durch den Cardinal / vnnd Bischoffen zu Augspurg / Petrum, vnd den Abbt desselben / Johann von Hirnheim / von dem Benedictiner Orden genommen / vnnd in ein Canonicat-Stifft / vnnd Probstey / verwandelt worden / So hat das Oel / das auß der Heyligen Cörper gerunnen / gleich / von demselben Tage an / zu fliessen auffgehöret: Wie Herr Carolus Stengelius, gewester Abbt zu Anhusen / parte 2. Rerum August. Vinde ic. pagina 242. berichtet. Es wechselt der Herr Probst allhie / bey den Schwäbischen CraißTägen / mit dem Gefürsten Abbt zu Kempten / deß Vorsitz halber / vnd ist deme nicht allein diese an der Jagst gelegene Statt Elwangen / sondern auch ein feines Ländlein gehörig / in welchem / neben andern Orthen / Lautern am alten Remsthal / vnnd das Schloß Tanneburg / oder Tannenberg / (allda im Jahr 1645. Frantzosen gelegen / ) sich befinden. Hat auch vnderschiedliche Lehen-Leuthe; vnnd ist sein Monatlich einfacher Reichs-Anschlag fünff zu Roß / vnd achtzehen zu Fuß / oder 132. Gulden / vnd zu Vnderhaltung deß CammerGerichts jährlich 108. Gulden. Auff dem Reichstag zu Regenspurg Anno 1641. hat sich der Herr Probst beklagt / daß man vorgeben wolle / ob were dises Stifft erst vmb das Jahr 1555 entweder in den FürstenRath erhoben / oder zur Fürstlichen Stelle vnd Stimm / auff den Reichs-Versamblungen zugelassen worden; da doch diß Stifft Elwangen den FürstenStandt in dem Heiligen Römischen Reich / von etlichen hundert Jahren / kundtbarlich / ruhig / vnd ohne Vnterbruch / oder Widerrede / geführt / vnd hergebracht habe. Vid. Limnaeus de Jure publ. tom. 4. p. 494. seq. Er hat neben sich einen Dechand / Custos / 12. Canonichen von Adel. 4. Verweser. 18. Vicarios Chori. 2. Leviten. 1. Alter Diener. 1. Beichtiger / vnd einen HoffPrediger. Den Catalogum der Aebbte vnd Pröbste allhie / setzet Stengelius in Mantissa ad Commentar. R. A. cap. 12. biß auff den 58. Praelaten / Herrn Johann Jacob Blarer von Wartensee / der Anno 1621. erwöhlet worden ist / vnd noch im Jahr 1652. regieret. In dem nächsten Teutschen Krieg / ist Elwangen etlich mal eingenommen worden.
Es ligt dieses Stättlein im Schwartzwald / nicht weit von Villingen / vnd S. Peter / vnnd ist Oesterreichisch / wie von Balingen den siebenzehenden Febr. Ann. 1641. geschrieben worden ist. Zu deß Munsteri Zeiten / wie er berichtet / soll es denen von Rechberg gehört haben.
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 66. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_094.jpg&oldid=- (Version vom 31.7.2018)
