69. Kreutzer zu rechnen. In einer geschriebenen Verzeichnuß hab ich gelesen 138. Gulden 21. Kreutzer 3. Heller / wird aber vielleicht verschrieben worden seyn. Die Pfarr- vnnd HauptKirchen hat einen Catholischen Dechand / gleich wie das Carmeliten Closter einen Prior: Ist auch ein Teutscher Hoff allhie. Anno 1645. den 17. 27. Aprilis / Abends zwischen 5. vnd 6. Vhren / hat man vor dem Segeringer Thor / die Sonnen gantz blutroth gesehen / daß auch auß derselben ein vnzahlbare Meng blaw / schwartz / vnd fewrige Kugeln / wie Granaten / gefahren / die sich hin vnnd wider vertheilt / viel vber / vnnd in diese Statt / in der Gegend deß weissen Thurns / gefahren seyn. Hernach den 9. 19. Julij / ist die Statt voller kleiner weissen Vögel geflogen / welche / ohne daß sie Flügel gehabt / vnd etwas grösser gewesen / den Omeissen gleich gesehen. Darauf ist / den 20. 30. diß der Chur-Bäyrisch Obrist Creutz allher kommen. Den 10. 20. Augusti aber / nach der Allerheimischen Schlacht / haben die Frantzosen die Statt beschossen / vnnd den 14. 24. diß / mit schlechtem Accord einbekommen: Die gleichwol den 9. 19. Novembr. dieses Jahrs / die ChurBäyrischen wider mit Accord erobert haben. Anno 46. kam die Statt in Schwedischen Gewalt / vnd muste Herrn Anthoni Dieterichen / Freyherren von Kettler / Herrn zu Heringen / Obristen / als OberCommendanten / mit dritthalb Regimentern Schwedischen Volcks / einnehmen. Anno 47. vmb die Zeit der Belägerung Memmingen / haben sie / die Schwedischen / die Statt selber verlassen; da es dann nicht gar ohne Plünderung zugangen. Sonderlich sollen die Juden gantz geplündert worden seyn / den 9. 19. Octob. wie in dem tomo 6. Theatri Europaei stehet. An. 48. den 11. 21. April / ist Dünckelspühel wider auf Discretion / oder Gnad / vnnd Vngnad / an die Schwedischen vbergangen. An. 49. seyn der beyden Außschreibenden Herren Craißfürsten / Costantz / vnd Würtenberg / subdelegirte Commissarien / hieher kommen / die Execution / Vermög deß General-Friedenschlusses / auch allhie fürzunehmen; daß also nunmehr auch mit dem Rath allda ein andere Bewantnuß / als vor diesem / der Religion halber / hat / von dem Einer berichtet / daß es allhie einen Innern / Grossen / vnd Eussern Rath habe.
Es ligt das Dörfflein oder Weyler NewenStättlein ein Viertel Stundt / vnnd das Dorff Jagstzell / drey Stundt von der Statt.
Von Theils Dornbeuren genandt / ein sehr nutzlicher Ort von Wein / vnd Obswachs / Kornfeldern / Wiesen / Alpen / Holtz / vnd ist gelegen / so bald man auß dem Bregentzer-Wald / vber die Losen / (so ein hoher Berg) herauß kommt / bey den Füssen deß Gebürgs / zwischen dem Bregentzer-Wald der Herrschafft Bregentz / dem Reichshoff Lustenaw / vnd der Graffschafft Embs. Es laufft dabey auch / auß dem Dornbieren Gebürg / ein Holtzreich Wasser / die Fußach genant / so zu Fußach in den Bodensee fällt. Hat vnderschiedliche Dörffer / als Oberdorff / Niderdorff / Hatlerdorff / Müllbach / Haselstauden / Schwartzach / Winsau / Füsseneck / vnd Ammenegk / daß alles ein Gericht / vnnd Pfarr / so vor vnerdencklichen Zeiten / gantz vnd gar denen von Embs zugehörig gewest: Wie sie dann noch heutiges Tags den Blutbann daselbsten / neben andern Regalien / vnd Stucken mehr / vom Römischen Reich / zu Lehen tragen: Sonsten aber ist solch Dorenbieren / so viel die Gericht belangt / vnder deß Hauses Oesterreich / vnnd der Herrschafft Veldkirch / Handen / also daß dz Gericht / die Stewer / Faßnacht Hennen / vnnetlich wenig Wasser-zinß / angeregter Herrschafft Veldkirch / im Jahr 616. gewest seyn: wie Schlee in seiner Beschreibung der Landschafft vnderhalb S. Lucis Steig / berichtet / dabey aber auch saget / daß das übrige / als der Wildbann / Vischbach / die Leibeigenschafft / vnnd was darzu gehört / Lehen / Zinse / Gülten / Zehenden / vnnd KirchenSätze / noch selbiger Zeit / den Grafen zu Embs zugestanden: wie sie dann / neben dem Wein: vnd KornZehenden / viel ansehenliche WeinGärten / vnnd Güter / darunder sonderlich der Knüberg bey der Haselstauden / allda / vnd in Oberndorff / ein Schlößlein / gehabt haben / so an einem lustigen Ort / vnd Außsehen / gelegen / in welchem
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 60. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_087.jpg&oldid=- (Version vom 31.7.2018)
