den drey Vorhöfen / noch 43. Gebäw. Der jetzige Vogt allhie / ist Juncker Heinrich Besserer von Talfingen / etc. vnd der Pfarrer M. Johann Müller.
Dise ReichsStatt wird von etlichen Aulen genandt / so im Kochenthal gelegen / vnd ein gar alte Statt deß Lands Rhaetiae ist / an dem Kocherfluß / in welchem die Alen häuffig gefangen werden / daher auch / oder aber von deß Kaysers Friderici Barbarossae Hoff / den er allhie / wo jetzt die Bergwerck-Gruben / vnd Schloßgräben / gesehen werden / gehabt / ihr der Name kommen seyn solle. Es solle vorhin / an diesem Orth / wo die Statt stehet / ein breyter See gewesen seyn / biß nach Aalfingen / oder Wasser-Aalfingen / also daß vber die Hurten die Leut zusammen gehen musten / daher noch der Orth in der vntern Statt zun Hurten genannt wird. Es hat vor Zeiten das gantze Albuch hieher / vnd solch Bezirck vmbs Jahr Christi 1350. der Cron Böheim / vnter die Regierung deß Grafen von Oettingen / gehöret / von deme diese Statt dem Graf Eberharden von Würtenberg / vmb zwantzig tausend Gülden versetzt worden / die aber folgends Käyser Carl der Vierdte / Anno 1360. belägert / erobert / vnd an das Reich gebracht hat. Vnd hat D. Jacobus Andreae Anno 1575. da reformirt. Martin. Crus. in Annal. Suev. Es hat diese Statt in dem nächsten Teutschen Krieg / vil außgestanden: Ist auch An. 1628. ein Römisch Catholischer Pfarrer allda eingesetzt worden: Wie davon beym Carolo Carafa, im Anhang seiner Commentar. de Germania sacra restaurata, zu lesen. Was bey den Nürnbergischen Executions-Tractaten / Anno 1649. wider Ellwangen / von ihr / so damaln guten Theils abgebrand gewest seyn solle / wegen der jährlichen Competentien von 300. Gulden / an baarem Gelt / zu Bestellung der Evangelischen Kirchen / vnnd PfarrHäuser / wegen deren darüber habenden Collatur, vnd Geistlichen Lehenschafften / neben einer gewissen Anzahl Getraids / Holtzes / vnd dergleichen / anfänglich geklagt worden / das ist aus den Actis zubefinden. Ihr / der Statt / Monatlich einfacher Anschlag zum Römerzug / ist 60. Gulden: zum Cammergericht gibt sie jährlich 45. Gulden / den Thaler zu 69. Kreutzer gerechnet. Limnaeus lib. 7. de I. publ. c. 5. Fr. Hortleder von Vrsachen deß Teutschen Kriegs / lib. 3. c. I. fol. 617.
Ein Gräflich Oettingisch Dorff / zwischen Nördlingen / vnd Wemmdingen / anderthalb Stundt vom Schloß Henneberg / im Rieß / sambt einer Kirchen / vnnd zweyen Adelichen von Stein erbawten Häusern / vnd einem Schlößlein / auff der lincken Seiten / gleiches Nahmens gelegen: Allda den 24. Julij / alten / oder den 3. Augusti / N. Cal. Anno 1645. das blutige Treffen / zwischen den Frantzösischen vnd Chur-Bäyrischen Völckern / vorgegangen / in welchem von 7. in 8. tausendt Mann todt blieben seyn sollen; aber mehr von Frantzosen / deren Fußvolck / sonderlich grob eingebüßt / vnd dessen vber die dreytausend allhie begraben worden: Wie von einem glaubwürdigen Orth man dessen gewissen Bericht zu haben vermeynt: Wiewol Georgius Engelsüß / in seinem Weymarischen Feldzug / sagt / daß der Käyser: vnd Bäyrischen 3. in 4000. gebliben / vnd von 1500. in 2000. gefangen worden: gleichwol von den Frantzösisch- vnnd Weymarischen / auch auff die dreytausendt vmbkommen seyn: Welche aber endlich / nach einem so blutigen Kampff / das Feld erhalten / vnd hernach viel ihrer Verwundten ins Closter Zimmern führen lassen / auch obgedachtes Schloß Henneberg eingenommen haben. Auff ChurBäyrischer Seiten / ist der General FeldtMarschall Mercy todt blieben / vnd der Graff von Gleen gefangen worden: auch besagtes Dorff darüber in den Brandt gerathen.
Matthäus Merian: Topographia Sueviae. Frankfurt am Mayn: Frankfurter Kunstverein, 1643/1656 (Faksimilenachdruck 1925), Seite 6. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_016.jpg&oldid=- (Version vom 31.7.2018)
