Am Fluß Langenthal / zwischen Brandis vnnd Willissow / gegen dem Sempacher See. Hat vor diesem dem Grafen von Kyburg gehöret / ehe solches Stättlein an die Berner kommen ist: Deren Schultheiß / Herr Hans von Bubenberg / Ritter / solches zuvor / da es noch Kyburgisch war / verbrannt hat. Munsterus in Cosmogr.
Vnder Hallwyl (welchen Ort / von deme der Hallwyler See den Nahmen / theils auch ein Stättlein nennen) an dem Fluß Aa / ein Meyl Wegs von Araw / vnd bey einer Meylen ob Bruck vnnd Habspurg / nahend der Aar / vnnd an einem gar lustigen fruchtbaren Ort / bey einem Weingartenberg gelegen. Hat ein Fürstliches auff einem erhöchten Felsen gelegenes Schloß / darauff vor Zeiten eygene Grafen / so von diesem Ort den Nahmen gehabt / gesessen seyn. Ist folgends an Habspurg kommen / vnnd dann vom Käyser Sigismundo den Bernern verpfändt vnnd vbergeben worden; deren Land-Vogt jetzt auff dem Schl. sitzt / das Stättlein aber hat für sich selbsten einen Schultheissen vnd Rath.
Auff ein halbe Stundt vngefehr vom Genffer See gelegen / daselbsten bey dem Schloß Riva dieser Statt Port / oder Schifflände ist. Solle den Namen von zweyen dardurch lauffenden Wasserflüßlein haben / deren das eine Lossa oder Losa / das ander aber Anna etwa geheissen. Theils wollen / dieser Statt Fundamenta seyen im Jahr nach Erschaffung der Welt 2790. gelegt / vnd sie Carpentras genannt worden; Welchen Namen Anno Christi 593. Bischof Martinus allda geändert / vnd darfür sie Lausunum, oder Lausodunum, oder Lausonium, genannt haben solle. Andere vermeynen sie seye die alte Römische Colonia Equestris, oder Civitas Equestris, weil auch noch jetziger Zeit die Hauptgaß / darinn die Gast-Herberg zum Engel / von altem her Vicus Equestris genannt seye: Vnd als sie mit Aventico vndergangen / vnnd hernach von den Königen in Burgund wieder erbawet worden / da habe sie den Namen von den obgedachten Wassern bekommen / dahin sich die Bischoffe von Aventico begeben / vnd hernach von den Käysern Ludovico I. Carolo II. et III. Item Henrico II. vnd König Rudolpho auß Burgund / viel Güter vnd herrliche Freyheiten bekommen haben. Stumpfius sagt / Es sey obiges vngewiß / es habe auch die Statt kein solches altes Ansehen. Der erste Aventinische Bischof (so in keiner gewissen Statt gewohnet / sondern der Aventier / oder Aventicorum Episcopus, genannt worden) ist gewesen / Prothasius, so zu den Zeiten Königs Clodovaei I. in Franckreich / gelebt / da Aventicum allbereit zerstöret lag / vnd Losanna, ohne Zweiffel / noch nicht gebawet war. Marius der vierdte Bischoff / so vmbs Jahr Christi 602. gestorben / ist der Aventier vnnd Losanner Bischoff genannt worden / vnnd An. 581. in sein Ampt getretten / daher gute Anzeigung / daß er der letzte gewesen / der noch den Titul der Aventier geführet / vnnd der erste / so den Namen von der Kirchen Losanna empfangen; Ist auch darauß wol zu verstehen / daß Losanna erst vmb diese Zeit ihren Anfang vnnd Namen bekommen habe. Hertzog Carl von Burgund / als er der Fürstin von Savoya Hülff gethan / hat solche Statt Losanna / so sonsten damahlen im Savoyschen Schutz war / ein Zeitlang ingehabt / nach dessen Todt sie wider an Savoya kam / biß Anno 1536. die Berner dieselbe dem von Savoya nahmen / vnd ein Hohe-Schul / (bey welcher fürnehmblich Viretus, Beza, Curio vnd Bucanus berühmt gewesen) an statt deß Bisthumbs / da anrichteten; Von welcher Zeit an die Bürger den Bernern die Pflichte leisten / so sie hievor einem Bischoff geleystet haben / vnd benebens bey ihren Freyheiten bleiben. Das Schloß aber wird von dem Bernerischen Land-Vogt bewohnet. In Anno 1521. war noch deß Bischoffs Reichs Anschlag / zum Römerzug / Monatlich einfach 14. zu Pferd / vnd 60. zu Fuß. Vnd hat die Statt Anno 1588. den 11. vnnd 12. Decembris / dem Hertzog von Savoya sollen verrahten werden; ward aber durch ein Sturmwind verhindert / vnnd entdeckt / auch viel
Matthäus Merian: Topographia Helvetiae, Rhaetiae et Valesiae. , Frankfurt am Main 1654, Seite 29. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Helvetiae,_Rhaetiae_et_Valesiae_029.png&oldid=- (Version vom 9.3.2019)
