eyn / vnd laß jnen eyne stunde darauff schwitzen / auff das er nit schwach werde / Also fare fort auff diese weyse wie jtzund vormeldet ist / biß dir Gott der Herre wieder auff hilfft / vnd mache dich ja nit zeytlich aus an die lufft / da laß dir gesaget sein. Allhier sind die dritten welche also procediren wie folget / Im anfange so bald ein mensch vorgiefftet / ehe yhm etwas auffgefaren ist / geben sie jm eine purgation ein / vonn dem puluer praecipitato hierzu kuenstlich mit golde bereytet vnd eine Latwerge odder pillen daraus gemacht / welchs durch brechen vnd stuelgenge vnd schwitzen die giefft außtreibet. Oder purgiren den krancken mit einem puluer das aus dem gummi Euphorbio zugericht ist / vnd zeigen des auch vrsache an / warumb sie solchs thun vnd also procediren / Aber weil vnter diesen dreyen processen / der erste proceß gemeiniglich am besten gethan vnd befunden / vnd auch der sicherste ist / wollen wir bey dem ersten proceß bleiben vnd derwegen mit niemandes zancken / vnd einem jeglichem sein gutduncken / rationes vnd experientz vngetadelt vnd gut sein lassen. Wenn aber kleyne kinderlin kranck werden vnd anfahen zu hitzen vnd schawern / so floesse jnen flugs ein / in einem Sawerampffer wasser ein wenig rechtschaffenens einhorns / wo du jnen haben magest / wo nit / so nym dafuor / rechtschaffenes hirschhorns / das schwischen zwayen frawen tagen in der brunst gefallen ist / decke es als dan feste zu vnd laß darauff schwitzen / Die Ammen aber sollen gleichwol auch daneben etwas mit vnter gebrauchen dass vor giefft dienet / derer stuecken den droben gnugsam angezeyget sind / auff das die milch auch eine krafft widder giefft bekommen.
Was aber das zeychen odder die bewlen / blattern etc. belanget / da soll diß im anfange deyne vornemeste jntention vnd vorhaben sein / das du die giefft / so viel moeglich zum zeychen herzu zihest vnd lockest / darumb sollen arme leute eyne ausgehollerte zwibel / die mit Theriac vnd Saffran gefoellet / vnd in heysser
Johann Sigismund: Ein Kurtzer vnd nützlicher bericht wess sich die gesunden / vnd kranken in der ferlichen zeytt der pestilenz verhalten sollen. Breslau 1553, Seite 10v. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_K_v_B_20.jpg&oldid=- (Version vom 31.7.2018)
