wenn die sonnen wol herauff kommen / vnnd ein schoen hell wetter draussen ist / Soll man die fenster des gemaches gen auffgange der sonnen oder Mitternacht oeffenen / auff das also die sonne mit ihrem hellenn scheyn / vnd strenen / die lufft deines gemaches rectificire / vnd reinige / vnd auff das auch der wind deine gemache durchgehe / vnd von dem vorhalten dicken / faulem vorschlossenem boesen lufft reinige. Wenn aber ein niebelich / truebe / odder regen wetter draussen ist / soltu die fenster deines gemaches nit auffsperren / sondern zuhalten / vnd dieweyl die lufft deines hauses mit reuchern aendern vnd rectificirn / wie vormeldet. Alhie sind jn den gemachern die Caminen sehr zu loben. Nach dem die sonnen vntergegangen / ist nit gut auff der gassen spaciren zugehen / vmb vieler vrsach willen / welche zuerzelen / ich vmb kurtz willen vnterlasse. Vber diss haldts in deinem hause rein / vnnd vom allem gestanck sauber / der wegen ist nit gut zu solcher zeit in den heusern schweine zu halden / oder sonsten an stinckenden vnnd vnsaubern oerter / oder bey Missthauffen / vnd pfudeln zu wohnen. Es ist auch nit gut hund vnd katzen die nit gerne daheimen bleiben in heusern zu haben / Denn sie brengen offtmals die gifft von nachbarn einem ins haus / wie ich solchs erfaren. Das ist das erste / wie man vor allem dingen des lufftes da man wonet / wol wahr nehmen sol auff das der selbe rein / frisch vnd gesundt sey.
Der ander weg ist / das man die vordechtigen oerter vnnd personen die noch kranck / oder kranck gewesen sindt / so viel moeglich mit allen vleiss meide / also auch die oertter do viel volcks zusamen kompt hoechlichen fliehe / als da sind Badstuben / Byhrheuser Trinckstuben vnd der gleichen oerter.
Johann Sigismund: Ein Kurtzer vnd nützlicher bericht wess sich die gesunden / vnd kranken in der ferlichen zeytt der pestilenz verhalten sollen. Breslau 1553, Seite 4v. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_K_v_B_08.jpg&oldid=- (Version vom 31.7.2018)
