/ wo anderst .49. grad on minuten des polus hoehe ist / auff den selben ein vnd viertzigsten grad / vnd auff das centrum a / leg die regel / zeüch ein gerad lini durch vnd für das centrum a hinauß / als weit dann der ring sein soll / die zeychne mit d vnd e / Die selbig lini zeygt an im ring die .12. mittel stund / von dem puncten e / Darnach so nym den halben Diameter von dem ring den du machen wilt / mit dem circkel / vnd setz einen fuß inn das centrum a / die ander auff die lini d e / ausserhalb des quadranten / des puncten zeychne mit f / auß dem selbigen f / reissz ein ring durch das a / vnd über die lini d e / so hast du die groesse vnd weitin des daumen rings inwendig.
WIlt du nun die stund lini inwendig in den Ring schreiben / so nym die hoehe der sonnen zuo allen stunden in dem zeychen ♈ vnd ♎ / als zuo der zwoelff stunden / die hastu vormals gerissen / durch den 41. grad / etc. Aber die eylff stund lini zuo reissen / so nym 39. grad der Sonnen hoehe / leg die regel darauff / vnnd auff das centrum a / reiß biß an den vmbkreyß des rings / daselbst ist die 11. vor mittag / vnd 1. nach mittag / also thuo für vnd für mit andern stunden. Wilt du aber die zwoelff zeychen außwendig auff den ring eynschreiben / darnach man den ring rüsten vnd stellen muoß / So man sehen will wie vil es geschlagen hab / so theyl den diameter des rings inn drey gleich theyl / verzeychne die puncten mit g h / Darnach setz den circkel in den puncten f / vnd mit dem andern in das g / oder h / Darnach reissz ein paralel lini gegen der lini a c des quadranten / auß dem puncten f durch den ring / Vnnd wo die selb Lini den Ring oben betrifft / daselbst schreib das zeychen ♈ / / vnd nach solchem vß dem selben puncten oben des rings / theyl den gantzen circkel inn zwoelff gleich theyl / vnd zeüch allwegen die zwen nechsten puncten gegen der vorigen lini / auch paralel weiß zuosamen / biß an den ort des rings / so hast du die zwoelff zeychen / vnd schreib sye eyn nach jrer rechten ordnung / also das des ♋ gegen dem centrum a gezeychet würt / vnd wo der punct a steht / in dem ring / da soltu ein kleyn loechlin hindurch machen / dardurch die Sonn die stund anzeygt.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 46. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_46.jpg&oldid=- (Version vom 31.7.2018)
