DArnach so der ring mit einer zimlichen breytin gemacht ist / die selbig breytin setz für dich / vnd sey die fürgeben breytin k l vnd m n / vnd reiß zuo ausserst innerhalb dem ring an beyden seitten nach der lenge zwo gerad lini / die ein zuo dem ♋ vnd ♑ / die ander zuo dem ♈ vnd ♎ / darnach beüg den ring zuosamen / gleich wie er zuosamen gelegt werden soll / das die zwen puncten vnden vnd oben mit f bezeychnet / ein punct werden / vnd geh in den abgesetzten circkel bey dem quadranten / vnd nym mit dem circkel die weitin f d / oder f a / das ein weitin ist / vnnd trags in den ring / setz einen fuoß in den zuosamen gesetzten puncten f / mit dem andern fuoß zeychen einen puncten mitten auff der breytin des blechs mit a / auff der andern seitten auch ein solchen puncten mit d / durch dise puncten reissz ein gerade winckel lini von der lini ♋ / biß an die lini ♈ / vnd zeychne die puncten mit o p / vnd q r / Darnach setz den circkel mit einem fuoß in das p / mit dem andern in das o / mit solcher weitin reissz ein circkel fierung als breyt die weitin o p ist / vnd wo die lini p r abgeschnitten würt / do mach ein puncten s / des gleichen thuo auff der andern seiten vß dem puncten r / vnd zeychne den puncten vff der lini p r / mit t / Darnach theyl dise zwey quadrantlich o s / vnd q t / in drey gleiche theyl / auff die selben puncten leg die regel gegen ein ander über / vnd reissz linien von der lini o p / biß zuo der lini q r / so hastu die lini der anfaeng der andern 12 zeychen / die soltu mit jren caractern bezeychnen / wie in disem hye bey gesetzten blech angezeygt würt.
WIltu nu die stund linien jnschreiben / so thuo den ring widerumb zuosamen / vnd geh in die obgesetzten taflen / die 12 zeychen jn zuo schreiben / vnd nym die hoehe der sonnen in allen stunden in ♋ vnd ♑ / leg die regel mit einem teyl vff die zal / den andern teyl vff das centrum a /
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 44. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_44.jpg&oldid=- (Version vom 31.7.2018)
