♈ vnd ♎ / vnd nymm als dann die weitin a d vorgemelt / der so das vertical machst / vnd setz den fuoß in puncten e / vnd mit dem andern fuoß mach ein puncten auff die mittel lini ♈ / vnd ♎ den zeychen auch mit f / vnd nym darnach die regel / vnd legs mit eim ort auff das e mit dem andern auff das f vnd reissz ein linien durch die lini der 12 zeychen / so hast du die puncten aller zeychen in abgeschnitnen puncten der selben lini des mittags. Darnach nym abermals mit dem circkel die weittin auß dem puncten a des horologiums biß zuo dem puncten da die lini ♈ vnd ♎ mit der stund lini so 11 ist vor mittag oder 1 nach mittag über schritten würt / die selben weiten trag in den puncten e der 12 zeychen wie vor / vnd mit dem andern fuoß mach aber ein puncten auff die lini ♈ vnnd ♎ durch die zwen puncten / zeych auch ein lini durch die 12 zeychen lini / so hastu die puncten aller zeychen auff die .11 vnd 1 stund lini / etc. Also thuo mit der 2 3 4 5 stunden lini auß vnd auß / etc. Aber die sechßt stund lini reissz gerad auff recht auß dem puncten e durch die 12 zeychen lini / was die selbig erzeycht / das soltu auch behalten.
Wiltu nun den stefft eynstecken mit seiner lenge / so reissz ein gerad linien auff die 12 stund lini auß dem puncten a der 12 zeychen lini / vnd wo die 12 stund linien angeruert würde / da mach ein a / daselbst sol der stefft eyngesteckt werden / vnd die weitin a a ist die lenge des steffts / also thuo auch in dem Horologion verticali / aber in dem Horologien Equinoctiali / Orientali vnd Occidentali ist der styler all weg als lang / als von dem puncten b biß in den puncten der zwoelfften stund lini auff der lini w x in dem oben eingeschriben vnd eyngesteckten instrument.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 30. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_30.jpg&oldid=- (Version vom 31.7.2018)
