DV solt zuom ersten ein geraden winckelhacken reissen / wie zuoforderst glert ist / darnach setz den circkel in den puncten a mit dem andern fuoß reiß ein circkel lini vom b biß in das c / als groß du dann den quadranten haben wilt / so hastu ein gerechten quadranten / das ist / ein viertheyl eines circkels / Wiltu nun den selbigen quadranten in seine 90 grad außtheylen / so theyl den circkel bogen erstlich in 3 theyl / darnach yetlich 3 theyl aber in 3 theyl / darnach yetlichs in 2 theyl / zuom letsten yetlichs in 5 theyl / so hast du 90 theyl oder grad / wie du hye oben syhest.
ERstlichen ist zuo disem werck not / zuomachen das Rectificatorium / das ist / ein driangel gemacht von vier linien / als polus hoehe Equinoctialis / Verticalis / vnd Horizontalis / den selben soltu machen also. Setz für dich den quadranten in 90 theyl getheylt / wie du oben hast leren machen / also das die linien a c übersich steh / die lini a b überzwerch in plano der erden gleich lig / vnd der limbus / das ist / der bog mit den außgetheylten graden gegen der lincken hand steh / vnd die zal der grad soll eyngeschriben sein / Angefangen bey dem b / vnd sich enden gegen
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 7. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_07.jpg&oldid=- (Version vom 31.7.2018)
