|
Diverse: Codex diplomaticus Anhaltinus/Band 3 |
|
|
1325. Mai 16. Des Bischofs Abbrecht II von Halberstadt Vernehmlassung auf die Klage des Fürsten Bernhard III von Anhalt bezüglich der Aschersleber Erbschaft.
We Albrecht van der gnade Goddes, de tho deme byscopdome tho Halberstat koren und bestedeghed is, we antwerden to den reden, de greve Bern van Anehald sprikd ane use gut, dat geriehte to deme Vrevele und to Eylwardestorp, to Wedders- leve, to Asschersleve und de dorp, de darto hören, dat disse richte und disse dingstule und dat darto hord, und de dorp, de darin hören, in use gravescap hören to Halber- stat und use ervelen is und hebbent in ervenweren herbracht van usen vorvaren und hebbent in nüt und in ghelde und in ervenweren, und willen dat vorestan, alse recht is, dar we dat to rechte vorestan scolen.
Echt sprikd greve Bern dat hus to Asscersleve an und dat blec, dat over deme watere hed und over den stenen, den dyk, den dykhof, den wyngharden, den hopgarden, de molen und de hove und dat latgüt, dat in dat ammycht hört, he hebbet in sines leenes gheweren. — Hir antwerde we Albercht de vorbescrevene here to, dat dit vor- bescrevene gut use und uses goddeshuses egen is, und hebben use vorvaren an us bracht und hebbend in nüt und in ghelde und in ervenweren. -
Echt sprikd greve Bern alsus: We greve Bern spreken deme byscope, deme ca- pitele, deme goddeshuse van Halberstat to umme Wegeleve, hus und stat, also verne, also de wysche binnen deme graven in deme haghene is, dat dat use veddere1 satte vor penninghe und bod de penninge to gevene binnen siner tyt: des was he cleghere went an sinen dot. Dat claghe we, dat man us use rechte gut to unrechte vorehalt und mit ghewalt, dat we des unboren hebben, des hebbe we schaden. — Hir antwerde we Albercht de vorbescrevene here to: Wegeleve, hus und stat, is use und uses god- deshuses eghen, und hebben dat an nute und an ghelde und an hebbenden weren und willen dat vorestan, da we dat to rechte vorestan scolen.
Echt sprikd greve Bern dat schultechdom an, de montye, den tholn, dat markrecht to Asscersleve, he hebbed in lenesgheweren. — Dar antwerde we Albercht de vorbe- screvene here to: Dat gut is use ervelen von deme rike und hebbent in nütte und in ghelde und in ervenweren. Umme den tyns, den greve Bern ansprikd oppe deme scohove und deme weyenberghe und in der Nygenstat, hir antwerde we Albercht de vorbescrevene here to: Dat gut is use und uses goddeshuses egen, und hebben den tyns in usen hebbenden weren und in nut und in ghelde. Umme de ioden, de greve Bern sprikd, dat he de hebbe in sinen lenesgheweren, dar antwerde we Albercht de vorbescrevene here to: In user stat to Asscersleve Sitten ioden, de hebben we in usen weren; wel greve Bern de besculdegen, de wii we ome to rechte setten.
Echt sculdeget greve Bern her Hanse van Crendorp, he sitte oppe sineme egene to Snetlinge. — Hir antwerde ik Hannes van Crendorp to: Ik hebbe dat hus to Snetlinge und dat darto hord, van deme goddeshuse und van deme byscope van Halberstat, und he wel des min rechte were wesen und wel mich weren, dar he mik to rechte weren scal.
Diverse: Codex diplomaticus Anhaltinus/Band 3. Dessau: Emil Barth, 1877, Seite 327. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_3_327.jpg&oldid=- (Version vom 31.7.2018)
