1308. September 9. Die Bürgermeister von Aschersleben verleihen die Stelle eines Priesters an dem Katharinenhospitale daselbst an den Pfarrer Heinrich Wineke von Helbra.
In nomine sancte et individue trinitatis amen. Propter hominum mutabilitatem actus humani pariter inmutantur, nisi sint vallati vivorum hominum testimonio aut firmentur ordine litterarum. Hinc nos consules civitatis Ascharie omnibus hanc paginam inspecturis presentibus et posteris volumus fore notum, quod nos de consilio maturo prehabito, hospitali nostro intra muros civitatis nostre sito, fundato in honore beate virginis Katerine, sicut consules nostri predecessores facere consueverunt, providere et consulere cupientes, in sacerdote scilicet, qui ibidem cultum divini officii custodiat in matutinis, missa et vesperis ac infirmis, cum necesse fuerit, curam in pertinenciis spiritualibus subministret, domino Hinrico de Helbere sacerdoti dicto Wineke, tamquam viro probato et nobis noto, hospitale predictum locamus et locavimus ad tempora vite sue, sub ista tamen forma, quod singulis annis dabitur eidem a provisoribus supradicti hospitalis una marcha argenti usualis, expensas etiam habebit in hospitali sepedicto, sicut ante eum sacerdotes alii habuerunt. Insuper si infirmitate brevi vel diutina, videlicet per mensem, per dimidium annum, per integrum annum, minus vel magis, quod absit, gravaretur seu etiam senio, quod laborare non posset in divino officio, raperetur, non tamen idcirco reicietur sed precio excluso, velud ante, prebendam comedet sacerdotis. Igitur ut ista locatio rata et inmutabilis perseveret, ipsam sigilli nostre civitatis munimine fecimus roborari, ratam et firmam eam habituri modo et ordine supradicto. Habita et ordinata et conscripta sunt hec tempore consulatus Hermanni de Daldorp, Hinrici de Kosede, Hinrici Rufi, Johannis de Radesleve, Everhardi Gerweris, Johannis Monachi, Johannis Westebernen, Nicolai de Suenebeke, Conradi Komis, Heydenrici de Bardewik, Heydenrici Barchusen, Sifridi apud Theatrum, Hinrici de Pedeliz, Conradi de Kosede.
Datum anno Domini mo.ccco.viijo, in die beati Gorgonii martiris.
1308. September 13. Markgraf Waldemar von Brandenburg bekundet den Verkauf des Dorfes Zicher bei Quartschen durch den Tempelherrn Günther von Köthen
Nos Waldemarus Dei gracia Brandenburghensis, Lusacie et de Landesberg marchio tutorque incliti Johannis de Brandenborch marchionis recognoscimus tenore presencium publice protestantes, quod frater Guntherus de Kothen vendidit discretis viris Thome et Johanni germanis dictis Hokeman et eorum veris heredibus villam Scicheher cum universis et singulis attinenciis, cum omni servicio et cum omni iure, utilitate et usufructu,
Otto von Heinemann (Hrsg.): Codex diplomaticus Anhaltinus. Band 3., Dessau: Emil Barth, 1877, Seite 114. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_3_114.jpg&oldid=- (Version vom 30.1.2019)
