1299. August 11. Abt Johannes von Ballenstedt excommuniciert als verordneter Richter des apostolischen Stuhles die Aebtissin Irmingardis II von Gernrode und ihr Capitel wegen der Weigerung, Jutta von Osden als Pröpstin des genannten Stiftes anzuerkennen.
Johannes Dei gratia abbas in Ballenstede, iudex a sede apostolica delegatus, honorabilibus viris et discretis abbatibus, prepositis, archydiaconis, plebanis, viceplebanis nec non aliarum ecclesiarum rectoribus, ad quos presentes littere pervenerint, salutem in Domino. Cum nos dominam Ermeghardim abbatissam ecclesie secularis in Gherenrode, Gertrudim de Eversten, Sophiam sororem eiusdem, Gertrudim de Hessnem, Gertrudim de Boventhen, Odam de Oseden, eiusdem ecclesie canonicas, legitime moneri fecerimus, ut dominam Juttam de Osden, a nobis auctoritate apostolica in prepositam confirmatam iuris ordine in omnibus observato, pro preposita reciperent et haberent et eandem per nos inductam in possessionem eiusdem prepositure corporalem permitterent uti suo stallo in choro et voce in capitulo tamquam prepositam in omnibus aliis iuribus, redditibus et proventibus ad eandem preposituram pertinentibus libere et quiete, insuper inhibuerimus eisdem et aliis omnibus canonicabus et canonicis dicte ecclesie in Gerenrode communiter et divisim, ne ipsam dominam Juttam in iuribus et bonis omnibus ad dictam preposituram pertinentibus aliquatenus inpedirent vel eciam molestarent, ferendo sentenciam excommunicacionis in easdem et eosdem, si essent in hac parte nostri mandati, immo verius apostolici, transgressores, et dicta domina abbatissa cetereque canonice predicte dictam dominam Juttam infra certum terminum ipsis a nobis adhuc deputatum pro preposita ipsam minime receperint et habuerint nec permittant eandem suo stallo in choro, voce in capitulo tamquam prepositam et aliis iuribus, redditibus et proventibus ad eandem preposituram pertinentibus uti libere et quiete, sed pocius ipsam in iuribus et bonis huiusmodi predictis contra nostrum mandatum et inhibicionem impediant et molestent, quare mandamus vobis omnibus et singulis districte precipientes sub pena suspensionis ab ingressu ecclesie, quam exnunc in vos ferimus, si non feceritis quod mandamus, quatinus dictam dominam abbatissam et omnes alias canonicas prenominatas, que excommunicationis sententiam a nobis latam auctoritate apostolica incurrerunt, excommunicatas denunctietis in ecclesiis vestris vel denunctiari faciatis singulis diebus dominicis et festivis, donec aliud a nobis receperitis in mandatis, mandantes vobis sub predicta pena, quatinus litteras huiusmodi vobis presentatas ipsis perlectis latori presencium statim restituere non tardetis.
Datum anno Domini moccoxcoixo, sequenti die beati Laurencii.
Otto von Heinemann (Hrsg.): Codex diplomaticus Anhaltinus. Band 2. , Dessau 1875, Seite 607. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_2_607.jpg&oldid=- (Version vom 31.7.2018)
