1297. December 2. Halberstadt. Bischof Hermann von Halberstadt über einen Rententausch, betreffend Renten aus Sedorf und Winningen, zwischen dem Archidiaconat von Aschersleben und dem Domkapitel zu Halberstadt.
Hermannus Dei gratia episcopus, Guntherus prepositus, Sifridus decanus totumque capitulum ecclesie Halberstadensis universis presencia visuris seu audituris salutem in omnium salvatore. Ne ea, que perpetue noticie debent titulis refulgere, ullam oblivionis caliginem paciantur, oportet subscripcionibus testium et scripturarum karactere roborari. Hinc est quod ad perpetuare rei memoriam tam presencium quam eciam futurorum deducimus per presentes, quod, cum olim ecclesia nostra esset oppressa nimio honere debitorum, honorabilis vir bone memorie Bertoldus de Klettenberch, archidyaconus Ascharie, pia motus consideracione, reverendi in Christo patris ac domini Volradi episcopi tunc Halberstadensis ecclesie consensu mediante promisit vendi seu eciam alienari a predicto archydiaconatu suo decimam in Sedorp, que ad eundem archidyaconatum omnimode pertinebat, ita quod pars precii ipsius decime, utpote octoginta marce Stendaliensis argenti, fuerunt in usus ecclesie nostre converse ad predictorum debitorum sarcinam aliqualiter relevandam. Quapropter nos prelibati archidyaconatus indempnitati, sicut sumus eidem vice versa obligati, consulere liberaliter cupientes in restaurum memorate pecunie in usus nostre ecclesie, ut superius exprimitur, converse damus et concedimus ac perpetuo appropriamus supradicto banno Ascharie, quin imo incorparamus eidem septem marcas cum dimidia usualis argenti cum bonis et hominibus in campo et in villa Winnige sitis et manentibus, ad villicacionem nostram in Quenstede quondam pertinentibus, ab1 archidyacono, qui pro tempore fuerit, a suis quoque successoribus singulis annis percipiendas, omni quoque iure et utilitate, quo ad nos pertinebant, perpetuo possidendas, nobis in eisdem bonis quinquaginta maldras tritici singulis annis ministrandas nichilominus reservantes. Cum autem nobis placuerit et visum fuerit expedire, quocumque anno ante diem beate Walburgis predicta bona in Winnige cum omnibus suis attinenciis pro octoginta marcis Stendaliensis argenti supradictis, ab archidyacono Ascharie, qui nunc est, vel a successore suo, quicumque pro tempore fuerit, reemendi habebimus liberam potestatem et dictus archidyaconus ipsi banno Ascharie de consilio seniorum dominorum nostrorum cum tali pecunia redditus alios tenebitur comparare. Huius rei testes sunt: honorabiles viri et domini Anno scolasticus, Heydenricus vicedominus, Gevehardus, Guncelinus, Gevehardus, Lodewicus, sancte Marie, sancti Bonifacii, sancti Pauli Halberstadensis et in Wallebeke ecclesiarum prepositi, Rodolfus de Gatersleve, Thidericus de Hesnem, Johannes de Drenleve, Fredericus de Plozcek, Gerhardus de Querenvorde, Wernerus de Wantzleve nostri concanonici, et alii fide digni. In cuius etiam rei testimonium presentes litteras sigillorum nostrorum munimine fecimus roborari. Actum et datum Halberstat, anno Domini mo.cco.xc.vij, feria secunda in adventu Domini, in nostro capitulo generali.
Otto von Heinemann (Hrsg.): Codex diplomaticus Anhaltinus. Band 2. , Dessau 1875, Seite 583. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_CDA_2_583.jpg&oldid=- (Version vom 31.7.2018)
