rente to der selscop behoff 300 mark Lub., dar mote wy des jars 30 mark van geven. Got helpe uns ut den noden.
Item, Hildebrant, ik hope to Gode, dat dat was unde werk 10 tonns wol overkomen sy, Got gevet. Item, Hildebrant, ik en kan juwer Tomaschen laken nicht vorkopen, er ik en kopman hebbe. Ik wel in al des besten ramen dat eiirste dat ik, off Got wel, to Lubeke kome.
431. Tideman Brekelvelde an Hildebrand Veckinchusen in Brügge.
- Rev. St.-A. Orig. Adr.: An Hildebrant Veckinchusen to Brugge littera detur.
Vruntlike grote tovorne screven. Hildebrant, gude vrunt, juwen breff, ghescreven 20 in merte, hebbe ik wol vornomen, wo gy op my kofft hebben 30 ℔ grote, alse op de Tomasche laken. Des wetet, Hildebrant, dat ik de 30 ℔ grote tosecht hebbe to betalene, doch ik en hebbe, also helpe my Got, noch 1 laken van den Tomaschen nicht vorkofft unde ik hebbe er in en terlink slan laten 16 mit deme slachdoke, alse 1 satgrone. Ik wolde, dat et satbla were. Item 5 pers. Item 2 grone. Item 2 sangwin, 1 hemelbla unde 5 rode mit deme slachdoke. Aldus blivet dar noch 7 laken mit deme gronen slachdoke, de denke ik mit den eiirsten to Prutzen wart to sendene an Tideman Swarten, alse gy my screven hebben, wante et is hir gheine ghading.
Item, Hildebrant, so hebbe ik Hinrik Scilhorne unde Sander Hop de 44 ℔ grote betalt lichte op 40 mark Lub. na. Ik hebbe en ghescreven, dat se dat op my overkopen solen, ik welt gerne betalen. Mer seker, Hildebrant, et is my sur gheworden, wante ik en sy van unser wegene nicht by ghelde unde ok so is dat ghelt quat to Hamborg to schikkene.
Item alse gy screven, dat gy hopen, dat dat werk by 12 ℔ grote ghelden sole unde was by 59 mark. Hildebrant, an den wasse dunke my, dat gy ju vorscreven hebben, wante ik hebbe 3 andere breve, dat et dar nicht mer en ghelde dan 49 mark. Aldus solde dat 10 mark schelen.
Item alse gy scriven, dat ik uns wat kopen solde op dat ghelt, dat men uns schuldich is van der syden, des wetet, Hildebrant, dat hir nicht to kope en is ume rede ghelt; ik late stan to borghe, Hildebrant, ik wel des besten ramen.
Item, Willem Schoneweder, de hefft unser roden laken 1 ghekofft. Doch he hefft dat en weech, mer des kopes en sy wy noch nicht al ens. Op pinxsten sal he dat betalen.
Hildebrant, des is 14 daghe, dat ik van Luneborge quam unde dar en hebbe ik mit al nicht gheschaffet anders dan ghelt vorteret, Gode sy et gheclaghet. Hans van Minden vellet wol alse unredelik alse Peter y dede. Wy sin jamerliken vorraden mit der boveriie. Anders en wet ik ju nicht to scriven mer blivet ghesunt. Ghescreven des donnerdages to Paschen.
Item, Hildebrant, so is juwe broder noch to Luneborge unde Hans Housten is dar ok noch mit eme unde ik en wet nicht, off he van Luneborge ut to
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 436. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_436.jpg&oldid=- (Version vom 31.7.2018)
