430. Tideman Brekelvelde in Lüneburg an Hildebrand Veckinchusen in Brügge.
- Rev. St.-A. Orig. Adr.: An Hildebrant Veckinchusen to Brugge littera detur.
Vruntlike grote unde wes ik gudes vormach. Hildebrant, ik hebbe beide juwe breve wol vornomen, den enen ghescreven 5 daghe in februario unde den ander 7 daghe in februario, unde gy hebben noch op my ghekofft van Peter Tite 24 ℔ grote to Hamborg, to betalene Sander Hop. Hildebrant, desse breve quemen my beide her unde ik en wet nicht, war ik ghelt nemen sal mede to betalene, wante ik en hebbe van enen terlink Tomascher laken noch 1 ₰ nicht entfangghen. Also helpe my Got darto, so en hebbe ik nicht mer gheldes dan 9 mark Lub. van alden sickeltune unde ok so hebbe ik er noch 3 unverkofft. Hildebrant, ik en wet nicht, warmede to betalene unde darto off ik ghelt to Lubeke hedde. Ik en wet nicht, wo ik dat to Hamborg brenghen sal wy en moesten grot eventur stan. Hildebrant, ik wolde, dat wy so verne komen weren, dat wy dat ghelt beweren mochten to Vlanderen wart, wante dar en is nein profiit ane, solde wy dat ghelt altos so over wessel. Item ik hebbe dat scharlaken to Lubeke in ene tunne ghedan unde hebbet bevalen, dat ment to Hamborg wart senden sal. Item, Hildebrant, dat ander scharlaken is in Prutzen vorkofft vor 40 mark Prusch unde ik hadde dar 12 elen Vlam. nyes kanifes ume ghedan, de hevet he to ghegeven. Hirume so gevet Tideman Borstal van unsem ghelde dar weder to miner behoff 12 ellen kanifes. Ik dede dar ok 1 huve to, de wart my ghegeven. Ok wart my 1 huve ghegeven ume dat laken, dat ik ju in der tunne sende unde my vorwundert, dat gy solke laken sunder huven en wech senden.
Item, Hildebrant, ik hope juwe Warstensche sin wol overkomen in Prutzen. Ik hadde se ghesceppet in Ludeken Malchin. Item, juwe Tomasche sin noch al unvorkofft. Ik hebbe se Merten al bevalen, dat he dat beste darby do unde ok by unsen 4 Yperschen laken. Seker, Hildebrant, in al Lubeke en is nicht 1 wantsnider, de an de Yperschen welle. Ik mot vorbeden to der tiit, dat 1 kome, de se kope. Ik ret en aschedaghe van Lubeke unde ik en wet noch nicht, wanner dat ik van hir komen kan, seker dar ik nicht wol mede to en kome. Unde ok vor uns beiden nicht en is anders nicht op desse tiit dan blivet ghesunt. Ghescreven 6 daghe in martius.
Item, Hildebrant, gy screven, kunne ik van deme scharlaken 14 off 15 ellen vorkopen na profiite, dat ik dat do. Des wetet, dat my dat nicht to donde en stet. Gy solen wol sein, wo dat gheschapen is, alset, off Got wel, to ju komet. Item, Hildebrant, Zyvert scrivet ju al dink van Peters deghedingge unde ok sendet he ju 1 van juwen rekenscop over de schelingge, hebbe wy dar in ghescreven mer tron, Hildebrant, gy hebben umer ghelt abrede inne van der selscop wegen unde ik hebbe in de selscop ghelent in ½ jare by 200 mark Lub., der ik tachter bein. Darto so hebbe wy noch op
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 435. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_435.jpg&oldid=- (Version vom 31.7.2018)
