416. Testament des Engelbrecht Veckinchusen in Lübeck. – 1434 Juni 12.
- Lübecker Staatsarchiv, Sammlung von Testamenten. Perg. Orig. Rücks.: testamentum Enghelberti Vekkinkhusen 1434.
In godes namen amen ik Enghelbrecht Vekkinkhusen wolmechtich mynes lyves, myner synne unde redelicheyd isset, dat ik van dem dode vorekomen werde, so sette ik myn testamente to deme love Godes aldus. Int erste gheve ik 3 marc pennige to beterende weghe unde steghe. Item jewelker kerspelkerken bynnen Lubeke geve ik 20 marc Lub. to dem buwe. Item den broderen to der Borgh geve ik 30 marc Lub. unde to sunte Katherinen gheve ik 60 marc Lub. to erem buwe. Item in desulven beyden clostere gheve ik jewelkem brodere, de prester is, 8 sl. und den anderen, de nene prestere sint, geve ik yslikem 4 sl. in ere hande to donde up dat ze my in ere dechtnisse nemen unde unsen heren God truwelken vor my bidden. Item to sunte Johanse deme vrowenclostere geve ik 20 marc Lub. to dem buwe unde jewelker juncvrowen, de gekronet is, geve ik 1 marc und den anderen ungekroneden geve ik isliker 8 sl. Lub., begherende dat ze my nemen in ere ynnigen bede und God truwelken vor my bidden. Item des hilghen gheystes kerken bynnen Lubeke geve ik 10 mark to dem buwe und wil dat myne vormundere darsulves geven schullen dat erste jar lank na mynem dode wekelinges uppe enen dach welken ze willen den armen kranken up den bedden ligghende islikem 4 pennige, dat ze God vor my bidden. Item int ghasthus achter dem hilghen gheeste geve ik to behuf den armen, de men dar herberghed, 10 marc Lub. Item in de vyf elenden huse bynnen Lubek geve ik islikem 5 marc, half to dem buwe und de helfte den armen, dar geherberged in de hande to delende. Item to sunte Ghertrudes kerken und sunte Jurgens kerken gheve ik ysliker 10 marc to dem buwe. Item den seken bi Travemunde geve ik 10 marc to erem buwe und wor ze des meyst to behoven. Item den closteren to Rene und Cerntyn geve ik jewelkem 20 marc Lub. half to dem buwe und half den beghevenen juncvrowen lyke in de hande to delende, dat ze truwelken vor my bidden. Item den Karthuseren to der Arnsboken gheve ik 30 marc Lub. Item den Karthuseren bi Rosteke geve ik 100 marc Lub., begherende dat ze in dem ersten jare na mynem dode an jewelker wekene singen ene zelmissen to troste myner selen unde unsen heren God truwelken vor my bidden. Item sunte Birgitten clostere bi Molne geve ik 30 marc Lub. to dem buwe. Item to Darpete in Lyfflande geve ik den predikerbroderen 100 marc Lub. to erem buwe unde islikem brodere, de prester is, gheve ik 1 marc Lub., dat ze God truwelken vor my bidden. Item dem vrowenclostere to Darpete geve ik 10 marc Lub. to dem buwe und ysliker gekroneden juncvrowen geve ik 8 sl. unde den unghekroneden isliker 4 sl. Lub. up dat ze God truwelken vor my bidden. Item den Karthuseren to Ghent und bi Brugghe und bi sunte Thomase geve ik ysilkem clostere 100 marc Lub. to dem buwe, also dat ze dat erste jar lank na mynem dode in jewelker wekene ene zelemissen singen scholen und my in ere dechtnisse nemen. Item den minren
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 427. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_427.jpg&oldid=- (Version vom 31.7.2018)
