Item so moste yc dat guet vorkopen unde mueste yd wedder inmanen. Oft yc hadde gevangen worden twyschen den steden, we wolde my geloset hebben? nement, yc hebbe dat myne hirto ghedaen. Bertram heft dat ghelt untfangen, he antwerde dar ok vore.
Item so heft Bertram hir an en hues lyggende 350 mark 10 mark, dyt hebbe yc in mynen handen up de 60 ℔ gr. dar gy umme ghemanet werden. Item umme de ander 60 ℔ gr. her Johan, Bertram vordrege syk myt em umme. Bertram heft dat ghelt untfangen, darumme so betale he Johan Bartluene.
Item so vorlore wy an den wasse, dat hir to Bruegge was, wol 10 ℔ gr., dar seghe gy ovele mede to, dat yd also vorkoft wart; alle wege to gueder rekenscap.
399. Heinrich op dem Orde, Tideman Brekelvelde, Everd Moyelik, Bertold Herentrey, Sivert Veckinchusen (in Lübeck) an Hildebrand Veckinchusen in Brügge. – 1425 Mai 13.
- Rev. St.-A. Adr.: An Hyldebrant Veckynchusen to Brugge littera detur. Der Brief scheint von der Hand Siverts Veckinchusens. In dorso von der Hand des Empfängers: 1425, 15 in junejus van 6 parssonen.
Vruntlyke grote vorscreven. Wetet leyve broder, dat wy juwe breyve wol vornomen hebben alse gy begerde syn, dat wy met juwen schuldemern spreken unde ok eynen leydebreyf van dessen rade etc. Aldus heft her Hynric Rappesylver umme unser bede wyllen sproken met Ludeken Steynhorste also dat ju Ludeke alsolke dage unde tyt geven wel, also ju dey Lumbarde unde Vlamynge geven wellen unde dey tijt lengen unde nicht korten, men hey wel in ere bunt nicht vorbunden syn, also hey dat ok Dusborch screven heft. Item Kule wel ju leyde geven went sunte Jakoppes dage[1] unde wan gy, ef Got wel, hyr komen, so ramet men wol lengern dach. Unde her Hinric vragede uns, ofte gy hyr ok noch borger weten unde hey meynde wol, nadem dat gy in 2 jaren neyn borgerrecht ghedaen hedden, so were gy ok neyn borger hyr, darumme solde men ju hyr lange noch leyden vor gastschult unde ok gevet desse rat neyn breyve op ere gheleyde nummende, men weme sey leyde toseggen, den wert dat wol gheholden unde uns duncket best, dat gy ju van dar slyten, also gy eyrst unde best kunnen unde quemen by vrunde op seker stede unde deden vort na vrunde rade, men gy wellen juwe dync setten na juwen egen gudduncken unde dat wel syk altyt also nicht wol vynden. Hedde gy dar eyn vast eynde[WS 1] ramet, so hedde gy hyr also vele beter doent ghehat. Darin ramet noch des besten unde beydet over uns. Ghescreven 14 dage vor pynxsten anno 25.
By uns Hynric opme Orde, Tydeman Brekelvelde, Evert Molken, Bertolt Herentrey, Syvert Veckynchusen.
Dit nemet int beste, bet dan ic screven hebbe.
- ↑ 25. Juli.
Anmerkungen (Wikisource)
- ↑ Korrigiert nach Berichtigungen
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 412. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_412.jpg&oldid=- (Version vom 31.7.2018)
