juwe ander schuldener vornemen, dat gy utborget hedden met vrunden, so solden syk juewe schueldener harde op vrunde holden unde kunden nicht also wol to eyme eynde komen. Vornemet desse meynynge bet dan ic ju scryven kan unde dat es uns allen van hertten leyt, dat gy in dessen vordreyte syn. Got betert al umme. Ghescreven des sunnavendes vor sunte Peters dage vor der vasten anno 25 met kortte.
Tydeman Brekelvelde.
Bertolt Herentrey.
Evert Molyke.
Zyvert unde Margrete Veckynchusen.
Her Johann van Emmeren kunde nicht wol darby kommen umme hast wyllen. Neyman wolde dyt scryven dan ic, darumme nemet int beste van myner wegen.
393. Margarethe Veckinchusen in Lübeck an Hildebrand Veckinchusen in Brügge. – 1425 Februar 17.
- Rev. St.-A. Orig. Adr.: An Hyllebrant Veckynchusen to Brugge littera detur. In dorso von der Hand des Empfängers: Greteken myn wyff 1425, 18 daghe in mertte.
Vruntlyke grote vorscreven unde wes ik gudes vormach. Hyllebrant, leve man, juwe leyff tho wetende, dat ic juwen bref wol vorstan hebbe, de ghesant was by Hunde den loper. Alse gy my screven van vele punten, dar kan ic ju nu neyn antwort opscreven op desse tyd. Weten sole gy, leve Hylbrant man, alse umme de breyve, de gy hir ghesant hebben, dat men de lesen solde den vrunden, dat heft myn bole Syfert alle ghedaen unde hadde se alle vorbadet in syn hus, dar was ik by unde alse my wol duncket, so is dar neyn trost, wente alse de breyve luden, dar wyllen se nycht op borgen, wente de breve luden nicht eyns wat ghebrec darane is, dat sal ju jowe broder wol scriven bet den ik. Wente se wellen syk van nenen dyngen underwynden, gy en hebbet myt jowen andern schuldern enen sekeren eynde unde ok alse gy scrivet, dat gy jowe borge vryg unde quit solen syn, also holt de utscryft nycht van der borchtucht, de gy hir ghesant hebben van Jorys Pyngel, de holt so ut, alse se syk alle vornemen, wurde Jorys Pyngel to kort in syneme rechte unde he syn recht vorlore, so mosten syne borgen darvor screven unde dat gelt opleggen. Der ghelyken mosten juwe borgen ok doen, wente alse gy scryvet weret sake, dat gy juwe recht vorloren, dat gy weder in den steyn wellen gaen, dar wyllet nicht to komen, wente juwe borge, de solden vor ju so wol gheholden syn, alse vor Jorys Pyngel. Darumme doet wol umme Godes wyllen unde duncket hir op unde latet ju dessespuntkes bet underrychten unde scryvet uns den met den ersten, wente se segget[WS 1] hyr alle tomale, wer dat sake, dat dat also were alse juwe bref utwyset, gy hadden dar dan vrunde ghenoch, de ju borgeden. Darumme doet wol, leve Hyllebrant man umme Godes
Anmerkungen (Wikisource)
- ↑ Korrigiert nach Berichtigungen
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 407. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_407.jpg&oldid=- (Version vom 31.7.2018)
