unde voge al dync to den besten. Got wet wol, dat my dyt scryven suer noch worden es, men gy gheloven my des nicht. Got betert al umme. Ghescreven 4 dage vor sunte Johannes dage anno 22 jar.
331. Tideman Brekelvelde an Hildebrand Veckinchusen in Brügge. – 1422 Juni 25.
- Rev. St.-A. Orig. Adr.: An Hildebrant Veckinchusen to Brugge off war he is, littera detur. In dorso von der Hand des Empfängers: 1422, 9 in jullejus.
Vruntlike grote unde wes ik gudes vormach tovorne screven. Hildebrant, gude vrunt, ju gheleve to wetene, dat ik juwe breve vuste al wol vornomen hebbe, sunderlinge den breff, den gy screven hadden des mandaghes to pinxsten[1], unde ik hebbe den breff al den vrunden lezen laten, alse gy my screven hebben. Wolde Got sine gnade gheven, dat al dink se queme, alse gy screven hebben, dat seghe wy altomale gherne. Unde des en is nein not op al punte antworde to scrivene, wante ik en wet nicht, war dat et inbringhen mochte. Doch, Hildebrant, sunderlinge alse gy scriven, wo gy hern Hinrik Rapesulver schuldich sin 75 marc darop hebbe he 2 pansir, de rekene gy so gut alse 25 mark unde gy sin van my begherende, dat ik de 2 pansir to my nemen solde unde gheven eme de 75 mark. Hirop, Hildebrant, so wetet, dat ik Margreyten alrede ghelent hebben by 40 mark unde se hevet my en deels smide dan, dat se in Lyfflande plach to dreghene; dit solde ik vorkopen. Nu en kan ik nummende hebben, de et hebben wel, aldus hebbe ik dat by my leghende unde vorwar, Hildebrant, de kopenscop is tomale krank, also dat dar neine winninge ane en is unde darto so vorleyze wy unse gut to der zee wart, also dat eneme yeweliken banghe noch wert an deme sinen. Doch, leve Hildebrant, wanner dat et also verne komen were, dat gy juwe schuldeners al ghestillet hedden, konde ik dan wes don sunder minen groten schaden, dar wollde ik dan gerne op denken. Ok so wetet, dat ik vruchte, dat wy op 100 mark na nummermer al van den sydenwerkerschen betalt en werden. Ok hebbe ik noch wol 10 ℔ syden to vorkopene, de Evert Molken unde my tohoret, de is tomale groff. Hildebrant, ik en wet ju anders nicht to scrivene. Wolde Got gheven, dat et also queme, dat gy es ens konden werden mit juwen schuldeners, so soldet al gut werden. Des mote uns Got ghunnen. Hirmede blivet ghesunt. Ghescreven op sunte Johannes avent to lichten anno 22.
332. Heinrich Hoep an Hildebrand Veckinchusen in Brügge. – 1422 Juni 30.
- Rev. St.-A. Orig. Pap. Adr.: An Hildebrand Vickenghuse littera detur. Darunter von H. V. Hand: 1422, 30 in junejus. Hinryck Hoep
- ↑ 1. Juni.
Wilhelm Stieda (Hrsg.): Briefwechsel Hildebrand Veckinchusen. S. Hirzel, Leipzig 1921, Seite 348. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_348.jpg&oldid=- (Version vom 31.7.2018)
