Seite:Briefwechsel Hildebrand Veckinchusen 306.jpg

	Wilhelm Stieda (Hrsg.): Briefwechsel Hildebrand Veckinchusen

Bertelt Herentrey dat gelt hirover gemaket hebben, dat se to Lubeke untfengen van Gobelynus Marten unde alse vro alse der wesselbreve hir qweme, so weren lude, de ju part rosterden an dem gelde. Dar was Bernt Plesco unde Gert van Mynden unde ok ander lude alse ic vornomen hebbe unde ok so hevet Hans Krane gerostert, so wes ju van dem gelde boren plach. Mer ic gelove wol, dat se nicht hebben solen, wente Tydeman Brekelvelde de hevet myn 50 ℔ gr. to Lubeke van sic geantwordett to myner behof by sulken beschede, dat et ju unde Evert van Megen unde Kavolt to wyllen sy unde ic hebbe hir myt Everde unde myt Kavolde gesproken; se menen my to seggen, en hedde ic de 50 ℔ gr. nicht enwech, se en solden my nicht werden, wente gy gein vulbort geven en wolden, dat se dyt gelt up rekenschop van dem keyser untfangen solden unde ok myt juwen wyllen nicht en was, dat se Gobelinus darhen santen, so dat gy do seden, gy wusten wol wor gy dat juwe manen wolden. Hirumme vedder so wyllen se to Lubeke scryven, dat dat men den hovetbref nicht van syc antworden sal up eventure ofte gy noch wes manen kenen unde en menen ju van dussem gelde nicht to geven vorder dem dat gelt tosecht, dat ic untfangen hebbe. Unde isset, dat et ju wylle nicht en is, dat ic dusse 50 ℔ gr. untfangen hebbe, so mot ic se en hirwedder geven. Hirumme bidde ic ju, dat gy hirynne gen vorder vordret en maken (!), wente ic anders de 50 ℔ gr. van my wedder antworden mot. Unde ic hebbe dat gelt hir betalt van Knevel, dat was nu gekomen up 28 ℔ gr. Vort vedder, so en node ic ju hir noch tor tyd nicht to komen, wante de lude syn noch sere wunderlyc. Ic wyl unsen kock Arnt betalen van juwer wegen, men ic wolde, dat unse wert ok dat gelt hedde, dar he vorsteyt. Hirmede so spare ju Got gesunt to langer tyd unde grotet alle vrunt. Gescreven ter hast 8 dage vor sunte Maddalenen dage anno 21.

Engelbrecht Veckinchusen.

283. Herman van Stiten und Heinrich Kule in Lübeck an Hildebrand und Sivert Veckinchusen in Köln. – 1421 Juli 16.

Rev. St.-A. Orig. Adr.: An Hyldebrant Vokkinchhusen unde an Syverd Vokkinchusen to Kolne unde elkem besu^ender, wor se sin, sal desse bref. In dorso von der Hand des Empfängers: is sunte Jacope^[1] 1 dach.

Vruntlike grote thovoren. Hyldebrand Vokkinchusen ju ghenoghe to wetende, dat wy ju des nicht gheloved en hadden, dat gy also ovel uns solden betalt hebben, alse gy doen hebbet. Gy untfengen unse reden pennynge in gudem gheloven unde wy en hadden ju nicht gelovet, dat gy uns alsulken unloven solden bewysed hebben, alse gy doen hebbet. Unde wy hebbet ju unde juwen broder to leve unde to gude doen umme rechte ere wyllen, dat wy aldus langhe styllesweghen hebben unde dat wy ok juwe hus unde juwe gudere hebbet aldus langhe nicht bekummerd had. Wente wy node de ersten wolden wesen, de ju anru^ochtich wolden maken, dat hebbe wy

---

1. 25. Juli.

Empfohlene Zitierweise:
Briefwechsel Hildebrand Veckinchusen. Leipzig: S. Hirzel, 1921, Seite 71. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_306.jpg&oldid=- (Version vom 31.7.2018)