Seite:Briefwechsel Hildebrand Veckinchusen 294.jpg

	Wilhelm Stieda (Hrsg.): Briefwechsel Hildebrand Veckinchusen

Item vorwar, Hildebrant, ik en kan den tymean nicht vorkopen unde ik wolde, dat her Hinrik Rapesulver wol betalt were unde som ander lude mede. Item de lade mit des koninges breve hebbe wy wol entfanghen unde wy hebben den breff unseme rade ghedan unde wy wellen noch morghen enen boden utsenden an Ghobelinus Marten wante de rat hevet uns enen breff ghegeven an den bisschopp van Brandeborge, dat se solken breff in erer were hebben lik alse Gobelinus begherende west hevet. Item Platensleegher en wel nein ghelt van sick seggen to gevene, al dink en sy ersten betalt. Hirmede siit Gode bevalen. Ghescreven 2 daghe in maio anno 21.

T. Brekelvelde.

269. Tideman Brekelvelde (in Lübeck) an Hildebrand Veckinchusen in Brügge. – 1421 Mai 8.

Rev. St.-A. Pap. Adr.: An Hildebrand Veckinchusen to Brugge littera detur. Darunter von H. V. Hand: 1421, 11 in settember in Andorpe.

Vruntlike grote tovorne screven. Wetet Hildebrant, gude vrund, dat ik juwe breve vuste alwol vornomen hebbe unde ik hebbe ju vuste antworde darwedder opgescreven by Hunde dem lopere unde alse my dunket, so hebbe gy juwer werdinne gescreven alse gy my gescreven hebben unde Got wet wol, wo uns dallink unde gisteren to mode west henz. Wante Tideman Junge sande my gisteren morgen boden, dat ik to em komen solde in de kerken. Alse ik to em quam, do quam he unde seggede my, wo sin sone Jurgen eme gescreven hedde, dat he van Hildebrandes wive manen solde 25 ℔ gr., wer et, dat se eme dat gelt nicht en vornogede, so solde her Tideman darmede varen also recht were. Aldus so gink ik mit her Tidemanne to Margreten unde he nam mit sik Hinrik Plesko unde Tymme Hadewerke. Alse wy to samene quemen, do seghede her Tideman to Margreten, alse he to my secht hadde, do seghede se, wo se nein rat en wiste, men dar leghe gud ghenoch in dem keller, konde se dat gut vorkopen, se wolden gerne betalen. Hildebrand mit korte wy en wisten neyn rat, doch so quam et also vorne, dat eme Margreten hevet wegen laten 18 schippunt und 5 lispunt tymeans mit den vatten, den sal he beholden vor 1 pant tuschen dit unde sunte Jacobs dag; itz et, dat men dar wes van vorkopen kan, dat sal men alyke wol do^en unde antwerden her Tideman dat gelt. Men itz et, dat mens nicht vorkopen en kan tuschen dit unde sunte Jacobs dage na profite, so wel en her Tideman vorkopen laten, alwo he ene ghevet unde wel Jurgen dat gelt senden; is dar dan brake ane, dat wel he alyke wol op ju vorderen. Hildebrand, hir mogen gy op vordacht sin, alse my dunket, so henz Philippus juwe swagere de breve hergebracht unde henz mede vorluden laten, wo gy entweken sin, dat God vorbode. Und ik hedde ghemeint, dat ik em dessen bref solde mede gedan hebben, nu was he enwech, er wy et wisten, wante de tymean wart ut juwen keller gebracht in her Johen Dersowes keller, do dat gescheyn was, do duchte my dat Philippus rede was to ridene.

Item Hildebrand, gude vrunt, Dirk Borger henz my wol gescreven, de wile dat gy hir weren, wo he vor ju betalt hedde Johannes de Broker

Empfohlene Zitierweise:
: Briefwechsel Hildebrand Veckinchusen. Leipzig: S. Hirzel, 1921, Seite 171. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_294.jpg&oldid=- (Version vom 31.7.2018)