|
Wilhelm Stieda (Hrsg.): Briefwechsel Hildebrand Veckinchusen |
|
|
in schepper Wycken van Dochem to Hamborch wort an den cranmester to Hamborch wort, dey salt vort van Hamborch to Lubeke senden.
Item so sende ick darnoch van Andorpe in scheper Marcquart Halleken 1 terlinch aldus 
ghemerket; dar es inne ton ersten 3 scharlaken, elk stet 8 ℔ 5 sl. Item so es darinne noch 3 meygronne Ypersche, elk stet 5 ℔ myn 5 sl. Item so es darinne 5 swarte Lyrrsche laken, dey stan 19 ℔ 13 sl., alle 5 laken. Item so sin hirto 5 wytte Belssche laken, elk stet 18 sl. gr., dar es 1 ton slachdoke. Item so es dey summe von dessen terlinge 61 ℔ 7 sl. erstes kopes.
Item so sal darkomen van Anxsterdamme noch dey dorde terlinch, dar sol ok inne sin 25 halve Anxsterdammesche, dey farve es aldus: 16 swarte 4 gronne 4 rode. Dey lat vorkopen myt den ersten, dat lude betalt werden. Dey terlinch myt den Yperschen es 1 breyt terlinch, den latet stan byt ick dar komme; wellt God, so mach ick sey sulven vorkopen.
Item so wete, dat ick dy noch sende in Lambrachtes Vrolinghes tunne, dat dy Clauwes Vrolinch sal antworden alse dat, ofte God wyl, over sal komen; dar es in er bussen 25 marc 5½ unsse karallen. Item so es in der anderen bussen 15 marc troys myn ½ unse karallen. Desse sin wol 3 marc beter dan dat ander. Elk punt stet 9 Frankesche crone. Desse karallen hebbe ick al don vorsnoren besunder 94 snore. Du salt, efte God wyl, wol seyn, wat dat es; lat dey meste sorte ersten vorkopen, der besten sorte saltu altos wol quit sin. Elk unse stet by 12 sl., dat es dat loyt by 6 sl. Lub. Desse karallen sollen wol weghen by 20 punt. Wolde dat punt ghelden 15 marc, so weret gud, mer doch so mochtes tu som snor don vorkopen op den marcket, also verne also dy dat gudduchte, lat dat wyf to hus to komen, dey dat smede op dat marcket pleghet to vorkopen, so machtu er dryerleye snor don, ein van den groten, 1 van den myddelsten, ein van den cleynesten. Sette er dat cleyne op 7 sl., dat middel op 12 sl., dat meste op 16 sl. Darin rame des besten myt dem wyve, prove sulven des besten. Dat meste ghelt were uns wol gud.
Ick sende dy in dessen breyve 2 sloytel to den bussen, dar dey karallen inne sint. Hirmede so var wol altos. Ghescreven op des hilghen lychemes avent 1420 in Brugge.
247. Kurt Visch und Evert Znoe aus Riga an Hildebrand Veckinchusen in Lübeck. – 1420 Juni 11.
- Rev. St.-A. Orig. Pap. Adr.: Dem erbaren manne Hildebrand Veckinchusen tho Lubeke littera detur.
Vruntlike grote vorscreven und wes wy gudes vormegen. Wetet Hildebrant, leve swagher, dat wy juwen breiff wol vornomen hebben, dey gescreven was des manendaghes na sunte Katerinen daghe[1], dar gy uns inne gescreven hebben, dat wy solden gaen by des stades bock und laten darinne clarliken
- ↑ 27. November 1419.
: Briefwechsel Hildebrand Veckinchusen. Leipzig: S. Hirzel, 1921, Seite 148. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_271.jpg&oldid=- (Version vom 31.7.2018)
