|
Wilhelm Stieda (Hrsg.): Briefwechsel Hildebrand Veckinchusen |
|
|
212. Hildebrand Veckinchusen in Brügge an seine Frau Margarethe in Lübeck. – 1419 Juni 2.
- Rev. St.-A. Orig. Pap. Adr.: An Margrete Veckinchusen to Lubeke lyttera detur.
Vrentlike grote vorghescreven, Greteke leyve wyf, wete dat my dey cranmester Marcquart Garstede noch der 2 tunnen nicht ghesant hevet, des my wunder hevet myt den paternoster unde 2000 schones werkes, wante ick beveyl eme muntlyken, dat hey my solde dey 2 tunnen senden myt den ersten 2 scheppen, des noch nicht ghescheyn ein es. Unde hir sint wol 4 gude scheppe kommen, dar vorneme ick noch nicht van den 4 tunnen van myt alle dat my to male qualyken kommet, wante dey marcket komme hiran, dat ick to Andorpe moyt unde vort to Lubeke wart, dus so hevet my dey cranmester nicht wol ghehandelt, wo hey 2 tunnen laten hevet. Zegge Hoyman, dat hey dy unde emen scryve, wor hey dey 2 tunnen in ghescheppet hevet.
Item so wete, dat ick dy sende to der Wyssemer wart in schepper Johan Fluwerck 12 tunnen seppen, dar es inne 3416 punt zeppe, elk 100 stet 1 gulden nobbel. Item so sende ick noch in dessen zelven scheppe Johan Vluwerk vorscreven 12 tunnen myt allune, dar es inne 4568 punt, dat 100 sal stan myt unghelde 8 sl. 6 d. nyes gheldes. Segge Heyman, dat hey den allun vorkope den guddonken[1] na marcganghe unde ok dey zeppe, dey schepper sal desse 24 tunnen vorscreven senden to Lubeke. God gheve beholden reysse, amen. Item so hebbe ick di unde Hoyman screven, so wes ick op dey Elve[2] sant hebbe, God gheve beholden reysse, amen, van al umme. Zegge Hoyman dat hey vorkope alle dynch, so emen dat ter hant komet, wante ick wyl dar, ofte God wyl, in kort sin, op dat my dey 2 tunnen nicht togheren welt. Hirmede so var wol in Gode. Altos ghescreven des vrydaghes vor pinxten in Brugghe.
Item so grote my alle vrende zere unde Grete van der Brugghen sunderlinghen unde zegghe Hinrych opm Orde, dat ick wyl in kort dar sin unde betalen sin stone wyllen dat 1000. Lat Hoyman dessen breyf lesen, so mach hey alle dynch weten. Item so hebbe ick Greten Annen koft wat wandes to enem roke unde ok Arnde des ghelykens, dat sal darin kort sin unde ok so hebbe ick dy ein fyn Arras koft, also du wol seyn solt, welt God, hirmede so var wol. Komen dar vrende ut Lyfflande, dey hantere wol unde rame des besten in allen saken.
213. Sivert Veckinchusen in Köln an Hildebrand Veckinchusen in Lübeck. – 1419 Juni 14.
- Rev. St.-A. Orig. Pap. in zwei im wesentlichen gleichlautenden, nur in der Schreibweise gelegentlich abweichenden Exemplaren, jedoch
: Briefwechsel Hildebrand Veckinchusen. Leipzig: S. Hirzel, 1921, Seite 47. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Briefwechsel_Hildebrand_Veckinchusen_234.jpg&oldid=- (Version vom 31.7.2018)
